Jats-ten nawrh tihtawp duh lo

Haryana-a Jats hnamte chuan an hnam puala reservation pek phutin nawrh an huaihawt chhunzawm zel a, nimin khan kawngpui eng emaw zat an dan bakah Rohtak leh Sonepat-a nawrh huaihawtnaah tharum thawhna a thleng thar leh.

Jats te nawrh huaihawt vang hian Rohtak, Hissar, Jhajjar, Kaithal, Jind leh Bhiwani khawpuiahte nimin khan curfew puan chhunzawm a ni.

State sorkar chuan Jats hnamte thilphut tihlawh-tlin a, OBC hnuaia special catergory-a dah a tiam a, hei hi state assembly session neih leh hmasa bera ngaihtuahah a tiam a ni. Mahse Jats-te hian ziak ngeia dah phutin nawrh hi an la titawp duh lo a ni. Ni kaw chhung nawrh an huaihawt tawh a, an nawrh huaihawtnaa tharum thawhna thlengah mi 12 in nunna an chan a, mi dang 150 velin hliam an tuar bawk.

Jats hruaitute chuan sorkarin special catergory-a dah a tum dan chu chipchiar taka hrilhfiah turin an phut. Hei bakah hian nawrh huaihawt vanga thi chhungte hnenah zangnadawmna pe turin an phut bawk a ni.

Haryana-a Jats te hian an hnam puala reservation siamsak tur hian hun rei tak an lo phut tawh a ni. Kum 2013 khan sorkar hmasa, Congress sorkar chuan 'Special Backward Caste' ah a puang a, mahse hei hi nikum khan Punjab and Haryana High Court chuan a hnawl. Supreme Court pawhin Jats-ten Centre OBC list-a dah an dilna a hnawlsak tawh bawk a, National Commission of Backward Castes in Haryana-a hnam hnufual zingah a dah tello niin a sawi.

Kumin February 14 aṭang khan Jats-te hian OBC hnuaia special category-a dah phutin nawrh hi an huaihawt thar leh a ni. Nawrh huaihawtte hian bus, car, mall, petrol pum leh Rohtak-a state finance minister Captain Abhimanyu-a chenna in te an halsak.

Jats-te nawrh huaihawt vang hian Delhi khawpuia tui supply-na pawh a buai phah a,nimin khan Delhi sorkar chuan tui supply an dawn
ṭhat loh avangin khawpui chhunga school zawng zawng a khartir. Nimin zing khan central, west leh north Delhi bialte chuan tui supply an hmu thei lo. Hei hian Delhi sorkar chuan Supreme Court hnenah tui supply chungchanga an buaina chinfel sak turin a ngen.

Supreme Court chuan nimin khan Haryana sorkar chu hriattirna pein, ni hnih chhunga an state chhung dinhmunte report thehlut turin a ti.

Delhi sorkar ngenna ngaihtuahtu, Chief Justice T.S. Thakur leh Justice U.U Lalit awmna bench chuan Haryana sorkar hnena hriattirna a pek rual hian, sorkar pahnihte an buaina chinfel tuma hma la loa, Supreme Court-ah an zualko chu ṭha a tih loh thu a sawi. Bench chuan, "Supreme Court thupek innghak kher a ni. In hmaa engkim rawn chhawpsak kher in phut a ni. Buaina chingfel tuma thawkchhuak loin, court-ah minister-te inṭhu mai mai zawk a, AC chamber-ah hahdam taka awmin, court chu thupek tichhuak turin in duh a ni" tiin, Delhi sorkar thu thehluh a ngaihtuah laia court chhunga awm, Delhi Water Minister Kapil Mishra a sawi chhan a ni.

Security force-te chu Delhi tui supply tu, Munak Canal-ah tirh niin, he hmuna nawrh huaihawtte chu chhuah tir a ni a, Delhi khawpui tui supply pawh dan pangngai anga pek leh thuai beisei a ni.

Sorkar laipui chuan Jats thil phut ngaihtuah tur hian Union Minister Venkaiah Naidu kaihhruai high-power committee a din. Committee member atan hian Satpal Malik, Avinash Rai Khanna bakah union minister pahnih - Dr. Mahesh Sharma leh Sanjiv Balyan-te ruat an ni.