Police-ten an zawn JNU zirlai 5-te campus-ah kir
Jawaharlal Nehru Univeristy (JNU) zirlai panga, February 9-a university campus-a ram dodalna thu sawia puh Delhi Police-ten man tuma an zawnte chu hun eng awm chen an bikbo hnuin Pathianni zan khan campus-ah an kir.
Zirlai panga-te hi - Umar Khalid, Anant Prakash Narayan, Ashutosh Kumar, Rama Naga leh Anirban Bhattacharya-te an ni a, anmahni tihchhiat tuma campaign an awm niin an sawi. Video siamchawp hmangin dik lo taka thiltia puh an nih avangin February 12-a JNU Students' Union president, Kanhaiya Kumar man a nih hnu khan an bibo ta niin an sawi.
Umar Khalid chuan, "Ngaihdan hran kan neih avangin min hlau a ni. Tunlaiah chuan ngaihdan hran lo neih hi ram dodalna a ni tawh a ni" tiin February 9-a JNU zirlai ṭhenkhatten Parliament beitu khaihlum tak, Afzal Guru-a khaihlum a nih champha an hman chungchang a sawi. He hun buatsaiha zirlaiten Afzal Guru-a thlawpna leh an ṭanna lam hawi thu an sawi chu police-te chuan India ram dodalna leh sorkar laka helnaah an puh a ni.
JNU Students' Union president, Kanhaiya Kumar pawh Afzal Guru hriatrengna inkhawm buatsaihah hian ram dodalna lam thu sawia puhin man a ni a, March 2 thleng jail-a tang tura tih a ni. JNU zirlaite chuan JNUSU president man a nih dan hi duh loin lungawi lohna an lantir a, zirtirtute pawhin an thlawp a ni.
Police-ten JNU zirlai panga man tuma an zawn zingah hian JNUSU general secretary, Rama Naga pawh a tel. Naga chuan nimina chanchin thar lakhawmtuten an kawmnaah, campus chhunga India dodalna thu aupuitute chu pawn lam mi an nih thu a sawi. "February 9 zan khan pawn lam mi ṭhenkhat rawn kalin India dodalna thu an rawn aupui a, heng mite hi kalsawn turin kan ngen nghal a ni. JNU security deparment-ah pawh complaint kan thehluh bawk. India dodalna thu an sawina-ah hian kan inhnamhnawih ve lo" a ti. Naga chuan police-ten man an tum a nih pawhin
ṭha taka an lo inpek mai tur thu a sawi.
"Delhi Police-te chu rawn kalin an duh angin action an rawn la thei a, lo dodal kan tum lo. February 9 zana inkhawm buatsaihtute kan nih avangin sawisel kan ni a, min man leh man loh chungchang chu university vice-chancellor thu a ni a, a thutlukna siam ang chu kan zawm ang " tiin Naga chuan a sawi.