Syria rama bomb puakah mi 140 an thi

Syria rama Homs leh Damascus khuaah bomb puak vangin mi 140 an thi a, mi dang eng emaw zatin hliam an tuar.

Pathianni khan Damascus khawfema Sayyida Zeinab hmunah ṭum li bomb a puak a, mi 83 an thi. Hemi ni vek hian Homs khuaah ṭum hnih car bomb a puak bawk a, mi 57 an thi a, an zinga a tam zawk chu civil mi an ni.

Islamic State (IS) firfiak pawl chuan khawpui pahniha bomb tipuaktu an nih thu an sawi.

Sayyida Zeinab-a bomb puahna hmun hi Shhite Muslim-te hmun pawimawh, Prophet Mohammad-a tunu thlan awmna bul a ni a, January thla khan he hmunah vek hian IS-te chuan bomb tipuakin mi 70 in an lo thihphah tawh bawk a ni.

Hetihlai hian Syria sipaite chuan Russia thlawpnain an ram khawchhak lama Aleppo bialah sorkar laka helte an bei chhunzawm zel. President Bashar al-Assad chuan sorkar sipaite chuan Aleppo-a helhoin an thunun bialte chu an hual mek tih a sawi a, IS chakna hmun Raqqa lam pawh beih chhunzawm zel an tum tih a sawi.

Pathianni khan US Secretary of State John Kerry chuan Russia Foreign Minister Sergei Lavrov biain, Syria sorkar leh helho ten inremna an siam theih dan tur a sawipui leh. Kerry chuan a thuphungin inremna an siam tawh thu a sawi a, inkahhai puan dan tur pawh an tihfel thuai a beisei thu a sawi.

Tun thla tir lam khan Geneva-ah inkahhai puan dan tur chungchang hi sawiho a ni tawh a, mahse inremna siam thei loin an ṭin a ni. Syria eptu pawl inzawmkhawm, High Negatiatons Committee chuan sorkarin helho laka beihpui a thlak mek chu a titawp chuan inremna lailawk lo siam chu rem an tih thu an tarlang.

Syria President al-Assad pawhin sorkar chuan inkahhai puan chu a inpeih reng thu a sawi a,mahse inremna an siam a nih chuan, helho chuan an bawhchhe tur a ni lo, a ti.