Canada embassy-a hnathawk mi 41 ko haw

Canada-a Khalistan firfiak, Hardeep Singh Nijjar thah a nih chungchanga India leh Canada ram inkar boruak chhia chuan ṭhat lam a la pan thei lo a, he thu kal zelah hian Canada chuan India-a an embassy-a thawk, mi 62 zinga mi 41 te chu an ramah a ko let.

Canada foreign affairs minister, Melanie Joly chuan embassy-a an hnathawkte haw-na tur chu an ngaihtuah thu sawiin, India an chhuahsan tawh niin a tarlang. "India hian dan lo leh tihluihnain Canada embassy-a hnathawk mi 41 te India-a awm phalna hlihsak a tum avangin loh theih lohin kan inhruai chhuah a ngai a ni," a ti. Joly chuan India chet dan chu boruak a chhiat zual loh nan chhan let an tum loh thu leh, mi 41-te awm phalna hlihsak a tum chu thil thleng ngai lo, international law bawhchhiatna a nih thu a sawi a,"Canada chuan international law zawm leh vawnhim hi a chhunzawm zel ang, hei hian ram zawng zawng a huap a ni. India nen pawh inbiakna kan nei reng tho ang," tiin a sawi bawk.

External affairs minister S. Jaishankar chuan Canada-in India a puhna chungchanga fiahna an neihte chu thla hmasa khan New York-a a awm laiin en dun a duh thu a sawi tawh tih tarlangin,"Canada hnenah hian Canada pawn lama Khalistan chetna zawng zawng kan hriat ang ang kan hrilh tawh. Tunah hian Canada-in India a puhna avangin kan palaite chuan vau an tawk a, kan consulate pawhin beih a tawk a, kan ram inrelbawlna thlenga sawisel kan tawh phah a ni," a ti.

India ram aṭanga Sikh tana ram sahthlak duh leh beitu pawl, Khalistan te hi firfiaka chetna hrang hrang avangin India sorkar chuan hel pawlah a puang tawh a ni. Khalistan hruaitu zinga mi, Hardeep Singh Nijjar hi firfiaka chetna leh tualthah tumna thubuai avangin India sorkar mi zawn lai mek a ni. Kum 1997 khan Canada-ah pemin 2015 kan Canada khua leh tui nihna a nei a, June thla khan mi tu tih hriat lohte'n Nijjar hi Vancouver-ah kap hlumin, Canada sorkar chuan India sorkar hi an ram chhunga tual thahnaah hian a inrawlh niin a puh. Canada hian India nena thawk duna he thil thleng chungchang chhui hi duh mah se, India erawh chuan Canada puhna avang hian thawhpui a tum lo thung.