PM-in RRTS rel hmasa ber vai liam

Prime minister Narendra Modi chuan India rama Regional Rapid Transit System (RRTS) rel hmasa ber, Uttar Pradesh-a Sahibabad leh Duhai station inkara tlan tur chu nimin khan a vai liam.

Union Minister Hardeep Singh Puri chuan RRTS-te chu 'NaMo Bharat' tia a hming an phuah thu a sawi. NaMo Bharat rel tlan tur zingah hian Delhi-Ghaziabad-Meerut corridor an tih, km 17-a thui chu, vawiin aṭanga mipuite hman theih tura ruahman a ni.

NaMo Bharat-te hi India rama regional service semi-high speed rel hmasa ber an ni. NaMo Bharat relte hian a hmangtute hahdamna pek chu a tum ber a ni a, WiFi leh ṭhutna hmuna phone charge theihna te a awm dawn bakah ṭhutna zau zawk duh tan book tur a awm ang a, emergency-a kawng hawn theihna tur leh, rel enkawltute biak zung zung theihna tur atan hmeh theih te an siam tel bawk.

Hardeep Singh Puri chuan NaMo Bharat relte chu,"Kan ram ngeia siam a ni a, darkar khata km 180 tlan thei khawpa chak niin, air-condition dah vek a nih bakah, a hahdam bawk a ni. Delhi leh Meerut inkar, km 82-a thui pawh darkar khat tling loah kan thleng zung zung tawh dawn a ni," tiin X-ah a tarlang. RRTS relte hi intercity (khawpui leh khawpui) tlan pawh tura rel tlan chak chi a ni a, tunah hian National Capital Region-ah corridor pariat siam tura ruahman niin, heng zingah hian Phase-I hnuaiah corridor pathumte chu siam hmasak tura sawi a ni.