Tui chhe paihna tihfai laia thi chhungte Rs. nuai 30 pek tur : SC

India rama tui chhe paihna (sewers) tihfai laia thi an awm ṭhin avangin Supreme Court chuan sorkar thuneitute'n sewers tihfai laia thi chhungte hnenah zángnadawmna Rs. nuai 30 an pe tur a ni tiin thutlukna a siam.

Justice S. Ravindra Bhat leh Aravind Kumar te awmna Supreme Court bench chuan he thu hi ngaihtuahin zángnadawmna pek tur hi an puang a, hei bakah hian sewers tihfai avanga piangsual hlen ta an awm a nih chuan Rs. nuai 20 pek tur a ni, a ti bawk. Rualban lohna dang eng chi pawh nei an awm a nih chuan Rs. nuai 10 pek bawk tur a ni.

SC chuan,"Heng ṭawphnawk tifaitu leh tihfai ngai hi awm lo tura state leh central sorkar hian hma an lak a ngai a ni," tiin a sawi. Court thutlukna hi PIL theh luh aṭanga ngaihtuah a ni a, sewer tihfai avanga thihna thleng chu High Court pawhin a vil a ngaih thu sawiin, sorkar pawhin hetiang thil hi a thlen fo lohna tura uluk leh zuala a vil a, hma a lak a ngaih thu a sawi bawk.

Nikum July thlaa Lok Sabha-a sorkar tarlan danin, kum nga ral ta chhung khan India ramah sewers tihfai avang hian mi 347 an thi a, thihna thleng zinga 40% hi Uttar Pradesh, Tamil Nadu leh Delhi-a thleng a ni.