India-in Palestine ṭanpuina a thawn

Israel leh Hamas-te indo mekna karah India chuan Gaza Strip-a cheng, Palestine mite ṭanpuina tur a thawn.

Ṭanpuina a thawn hian nimin khan Gaza ramri bula awm, Egypt-a El Arish airbase thlengin damdawi bakah harsatna tawkte mamawh tur chi hrang hrang a thawn a ni.

Ministry of External Affairs thupuangtu, Arindam Bagchi chuan,"Damdawi lam mamawh ton 6.5 leh chhawmdawlna hmanrua chi hrang hrang, ton 32-a tam chu Palestine mipuite tan IAF C-17 hmangin Egypt-a El-Arish airport-ah phurh luh a ni. Kan thil thawn zingah hian inzaina hmanrua te, puan in te, sleeping bag, tarpaulin, tui tihthianghlimna tablet leh hmeichhe mamawh thilte a tel a ni," tiin a tarlang. Palestine palai, Adnan Abu Alhajia pawhin India ṭanpuina an dawn avanga lawmthu sawiin,"Palestine mipuite chuan ṭanpuina an mamawh nasat avangin India thiltih avang hian an lawm em emin ka ring. Israel-in ni 15 zet kawng a dan tawh avangin eng bakah, ei tur, damdawi leh oxygen-te pawh kan tlachham ṭan tawh a ni. India hian kan dil pawh ni loin ṭanpuina min pe a, hei hi thil ropui tak a ni" tiin a a sawi ve bawk.

Gaza ramri kaltlang hian ram hrang hrang; Egypt, Turkey leh US te chuan Gaza ṭanpuina hi an lo thawn tawh a, India-in ṭanpuina a thawn pawh hi hemi kaltlang tura beisei hi a ni. India hian ram pahnihte indona chungchangah hian a thlawpna chin a sawi ve ve tawh a, indona erawh titawp vat se a duh thu a sawi bawk a ni.