CPCB-in IOC leh BPCL pawisa chawitir

Central Pollution Control Board (CPCB) chuan Indian Oil Corporation (IOC) leh Bharat Petroleum Corporation Ltd. (BPCL) te chu an petrol pump-a pollution venna tur khawl an dah loh avangin pawisa chawi turin a ti.

CPCB hian IOC chu Rs. vbc 1 chawi tura hrilhin, BPCL chu Rs. vbc 2 chawi turin a ti bawk a, hei hi firm pahnihte stock exchange filing aṭanga hmuh a ni.

IOC chuan,"CPCB aṭanga Rs. vbc 1 chawi tura tih kan nih chhan hi National Capital Region (NCR)-a kan pump-ah te Vapour Recovery System (VPS) kan dah loh vang a ni," tiin, Supreme Court-in hun tiam a siam chhunga VPS an dah hman loh avanga pawisa chawi tur an nih thu an sawi. "Kan company hnathawh leh thil dang a nghawng hran lo a, mahse, pawisa chawi ngai zat chu Rs. vbc 1 aia tam a nih loh kan beisei," tiin an sawi bawk.

BPCL pawhin Environment (Protection) Act, 1986 hnuaiah environment tana him lo a nih avanga a rulh let nana Rs. vbc 2 chawi tura hriattir an nih thu an sawi bawk a, petrol pump leh an dah ṭhatna hmunah te Supreme Court thu chhuak anga VPS dah hman lo an nih thu an sawi ve bawk. "Kan notice dawn hi kan la zir chiang leh ang a, a ṭul angin CPCB hnenah pawh ngenna kan siam ang. Kan company hi notice an pek zing aṭanga paih tur leh, hei aia thui kal lo tur hian kan ngen ang," tiin an sawi.

Petrol pump-a lirtheite'n petrol an lak hian petrol hu hi boruakah a leng ṭhin a, he petrol hu hian cancer thlen thei, benzene, toluene leh xylene te a pai a ni. Kum 2016 khan petrol pump zawng zawngte hi he petrol hu darh tur ven nan hian VPS nei vek tura hriattir an lo ni tawh a ni.