Madhya Pradesh-ah BJP leh Congress worker-te nuar

Assembly inthlan nei mai tur Madhya Pradesh-ah chuan ticket sem chungchangah lungawi loin BJP leh Congress party worker-te chu a hran ve vein an nuar.

BJP worker-te chu Jabalpur-a party office-ah kal khawmin Union Minister Bhupender Yadav hmaah an lungawi lohnate an aupui. Congress worker-te pawhin lungawi lohna lantirin Chief Minister hlui Digvijay Singh leh a fapa MLA, Jaivardhan Singh lem siamte an hal.

Jabalpur-a BJP worker-te nawrhna hi Madhya Pradesh inthlan tur atana an party candidate 92, list 5-na tihchhuaha lungawi lohna vang a ni a, Minister hlui Sharad Jain leh BJP ruh tak, Dheeraj Pateria ṭantute chuan party office-ah nawrh hi huaihawtin, Jablapur North-a ding tura dah, Abhilash Pandey an duh loh tih an sawi. Pungkhawmte hian MLA ni lai leh speaker ni ṭhin, Narmadapuram-a mi, Sitasaran Sharma duh lohna an au chhuahpui bawk. Chaurai-ah chuan party worker-te chuan Lakhan Verma-a candidate a ni chu an lawm loh thu an sawi bawk a, Nagaud-ah chuan minister hlui Nagendra Singh leh Pratima Bagri duh lohna a ri ring hle. BJP-in Madhya Pradesh inthlan tur atana candidtae list a puanah hian MLA ni lai Akash Vijayvargiya pawh a tel lo a ni.

Hetih lai hian Congress worker-te chuan Burhanpur, Shujalpur, Seoni-Malwa, Semaria leh Jaora constituency-ah Digvijay Singh leh Jaivardhan Singh te ding tur an duh lohna lantir nan an lemte an hal. Ratlam district, Jaora-a ding tura thlan, Himmat Shrimal lem pawh an hal bawk. Congress worker-te hian candidate hrang hrang an duh lohna lantir nan an au rual a, Other Backward Classes (OBC) tana seat a duh ang zat an pek theih loh avangin state Congress vice president, Damodar Singh Yadav chu a bang bawk a ni.

November 17-a inthlang tur Madhya Pradesh assembly-ah hian seat 230 awmin, BJP hian an party candidate tur hi mi 228 an puang tawh a, MLA ni lai mi 29 zet chu candidate zingah hian an tel tawh lo a ni. Congress pawhin candidate 229 puang ve tawh bawkin assembly speaker hlui leh MLA ni lai, NP Prajapati chu seat pek a nih loh hnuah list vawi hnih siamnaah pek a ni tawh a, BJP aṭanga Congress zawm thar mi panga te chu seat pek an ni bawk.