Delhi Police-ten JNUSU President bail dilna dodal

Delhi Police-te chuan ram dodal zawnga thu sawia puh, Jawaharlal Nehru University Students Union (JNUSU) president Kanhaiya Kumar-an Delhi High Court-a bail a dilna chu an dodal.

High Court chuan vawiin hian Kumar-a bail dilna chu a ngaihtuah dawn a, hemi hma hian Delhi Police-te chu an thil chhuina report te thehluh turin court chuan a hriattir bawk.

JNUSU president Kanhaiya Kumar hi university campus chhunga ram dodal zawnga thu sawiah puin man a ni a, March 2 thleng judicial custody-a awm turin tih a ni hnuin Tihar Jail-ah dah a ni. Mahse Kumar chuan an puhna hi thu dik lo a nih thu sawiin, sorkar laka helna leh ram dodal zawngin eng thu mah a sawilo tih a sawi.

JNU zirlaite chuan zirlai pawl hruaitu man a nih danah lungawi loin nawrh an huaihawt a, university zirtirtute pawhin an thlawp a ni.

Kanhaiya Kumar hian Supreme Court-ah bail dilna hi a thehlut hmasa a, mahse Supreme Court hian Delhi High Court-ah thlen zawk turin a hrilh a, High Court chu venhimna pawh khauh taka kalpui turin a hriattir bawk.

Delhi Police-te chuan February 9-a University campus-a firfiak Afzal Guru hriatrengna inkhawm buatsaihah kum 28 mi, Kumar hian India dodalna thu a sawi ngei niin an tarlang a, video footage-ah pawh a lang a ni, an ti. Police-te chuan Kumar leh zirlai ṭhenkhatte chuan Afzal Guru puala inkhawm buatsaih tura phalna pek chu hnuhkir a ni chung pawhin inkhawm hi an buatsaih lui a ni, a ti.

Kanhaiya Kumar bakah zirlai dang panga-te chu police-te hian man tumin an zawng a, zirlai panga-te hi hun eng emaw chen an bibo hnuah Pathianni zan khan campus-ah hian an kir leh a ni. Campus-ah hian police-te hi an luh phalsak an nih loh avangin an man thei rih lo a ni. An zinga pahnih, Umar Khalid leh Anirban-te chuan high court-a inpek an duh thu leh, hemi hma hian venhimna pe phawt turin Delhi Court-ah an ngen a, midang pathumte chuan anticipatory bail an dil.