Rohit Vemula pualin zirlaiten kawng zawh

Jawaharlal Nehru University zirlai leh zirtirtute chuan nimin khan January thlaa Hyderabad University-a zirlai intihlum, Rohith Vemula tana rorelna dik phutin kawng an zawh.

Rohith Vemula hi Hyderabad University-a research scholar a ni a, an university-a BJP zirlai pawl, ABVP hruaitu pakhat kutthlaka puh an nih avangin Dalit zirlai dang pali-te nen hostel aṭanga hnawhchhuah an ni. Mahse hnawhchhuah an nih hnuah hian January 17 khan hostel-a a ṭhianpa room-ah Rohith-a hi a inawkhlum a ni.

Hostel aṭanga hnawhchhuah an nih danah union minister, Smriti Irani leh Bandaru Dattatreya-te chu inrawlhah puh an nih avangin zirlaite chuan lung-awi lohna an lantir a, minister-te hi bang turin an phut bawk.

JNU chuan Rohith Vemula tana rorelna dik phuta kawngzawh hi Jantar Mantar aṭangin an nei a, Hyderabad University zirlaite pawhin Ambedkar Bhawan aṭanga Jantar Mantar thlengin kawng an zawh ve bawk.

Delhi Chief Minister Arvind Kejirwal leh Congress vice president Rahul Gandhi-te chuan zirlai kawngzawhte an thlawp. Rahul Gandhi chuan sorkar laipui chuan a duhdan kalha chete chu che thei loa siam a tum a ni, a ti.

Zirlai kawngzawhte hian zirna ina hnam inthliarhranna awm ṭhin chu an duh loh thu an aupui. Hnam inenhranna awm ṭhin tihbo a nih theih nan 'Rohit Act' siam turin sorkar an phut bawk.