Delhi khawpuiin tui supply la hmu ṭha lo

Haryana-a Jats hnam-ten reservation phuta nawrh an huaihawt chu tihtawp mah se, nawrh huaihawtten Delhi khawpui hmun ṭhenkhat tui supply tu Munak canal an tihchhiat avangin tui lama harsatna chu a la ziaawm lo.

Thuneitute chuan Haryana kaltlang, Munak canal siamṭhat hna hi kar hnih vel a awh mai thei niin an sawi. Canal tihchhiat a nih vang hian khawpui chhung hmun ṭhenkhat chuan ni li vel tui supply hi an hmu mumal tawh lo a,mahse thuneitute chuan an tui lakluh ang chu rualkhai taka sem a nih theih nan theihtawp an chhuah tih an sawi.

Senior water board official Neeraj Semwal chuan water treatment plant pakua zinga pali chauh hman theih a nih thu sawiin, hmun eng emaw zatah tui sem a la ngai tih a sawi. "Ni hnih thum hnuah mumal zawka pek theih kan beisei a, mahse a pangngai ang taka tui supply leh tur chuan ni 15 vel a ngaih hmel a ni" a ti. Canal chhia hi Delhi hmarlam, chhim lam leh khawthlang lamten an tuar nasa bik tih a sawi a, chenna in tam takah tui supply hi an hmu the irih lo a ni, a ti.

Delhi water minister Kapil Mishra chuan an buaina chu a la tawp mai lo tih sawiin, mipuite chu tui renchem turin a ngen. Pathianni khan Delhi sorkar chuan canal veng tur hian sipai eng emaw zat a tir a ni.