Kanhaiya Kumar bail dilna ngaihtuah hun sawn

Delh High Court chuan Jawaharlal Nehru Students' Union president Kanhaiya Kumar-a bail dina chu February 29-a ngaihtuah turin a sawn.

JNUSU president Kumar-a hi February 9-a university campus-a India dodalna leh sorkar laka helna thu sawia puh a ni avangin man a ni a, Tihar jail-ah tantir a ni. Delhi High Court-ah bail-a chhuah dilna a thehlut a, nimin khan court chuan a dilna hi ngaihtuah mah se, Delhi police-ten Kumar hi thu zawh an la duh tih an sawi avangin February 29-a ngaihtuah leh turin a dah ta a ni.

Kanhaiya Kumar chuan an puhna chu thu dik lo a nih thu a sawi a, finfiahna a awm tia an sawi pawh siamchawp a ni, a ti. Court-a petition a thehluhah Kumar-a chuan, university campus-a hun buatsaihah hian tharum thawhna lam hawi engmah a thleng lo a, sorkar leh India dodalna thu aupuia an puhna chu thu dik lo a nih thu leh, amah tihchhiat tuma beihna a ni tih a sawi.

Hetihlai hian Supreme Court chuan Patiala House Court-a Kanhaiya Kumar hruai a nih
ṭum kut lo thlaktu nia puh, lawyer pathumte chungchang chu ngaihtuah a remti. TV channel-te chuan Patiala House-a lawyer-te invau pung lai leh zirlai hruaitu kut an thlak laite hi an lo tilang tawh a ni.

Justice J.Chelameswar leh AM Sapre chuan hetiang hawia lawyer-te puhna thubuai hi court-ah a la lut ngai lo tih sawiin, counsel Prashant Bhushan hnenah application thehlut turin an hrilh a ni. Bhushan chuan heng lawyer pathumte hian February 15 leh 17-a court-a Kanhaiya hruai a nih ṭuma mipute kutthlakna chu an ruahmanna vek a nih thu media-te an hrilh a, buaina a awm leh chuan petrol bomb an hman tawh tur thu an sawi. Hei bakah hian Kumar-a chu a tanna cell chhungah ngei sawisel turin jail-a tan pawh an inhuam tihte an sawi.

Bhushan chuan Patiala House Court-a lawyer-te chet dan mawi lo tak chu dan bawhchhiatna a ni tiin, court chu an laka hremna lekkawh turin a ngen.