Rajya Sabha-ah eptu leh rorellai member-te in au buai

Parliament Budget Session chu nimin khan chhunzawm a ni a, mahse Rajya Sabha-ah chuan January thlaa Hyderabad University-a research scholar Rohith Vemula intihhlum chungchangah sorkar an demna thu sawiin, rorel thei loin an au buai.

Bahujan Samaj Party (BSP) hruaitu, Mayawati chuan Rohith Vemula chu intihhlum ni loa midang tihlum nia sawi leh, hrem a nih chungchangah union minister pahnih an inrawlh nia puhna chu sawifiah turin sorkar laipui a phut.

Mayawati thlawp hian an party MP-te chu House laiah an chhuak khawm a, union minister pahnih labour minister Bandaru Datatreya leh education minister Smriti Irani-te chu bang tura phutin an au a ni. Rajya Sabha member, Miniser Irani pawh inkhawmah hian a tel a, eptu party-te chu politics khelhna hmanrua atana zirlai naupang hmang lo turin a ti. Member-te in auh buai avangin Rajya Sabha inkhawm hi ṭum thum tihtawp lailawk a ni.

Nimin chawhnu kha Rajya Sabha-ah chuan tunhnaia central university boruak, a bikin Jawaharlal Nehru University leh University of Hyderabad-a thil thleng chungchangte sawihona hun atana ruahman a ni.

Lok Sabha-ah eptu party lian ber, Congress party chuan Jawaharlal Nehru University-a buaina theng mek chungchang sawihona hun buatsaih a phut. Party hruaitu Mallikarjun Kharge leh KC Venugopal-te chuan House-ah an thil phut hi an sawichhuak. Congress vice president Rahul Gandhi chuan Prime Minister Narendra Modi-a kaihhruai sorkar leh RSS-te chuan ramchhung hmun hrang hranga college leh university zirlaite chu aw chhuah thei lo tura rahbeh an tum a ni tiin, zirlaite humhalhna tur dan siam a ngai a ni, a ti.