JNU zirlai pahnihte police kutah inpe

Delhi Police-ten ram dodalna thu sawia puh man tuma an zawn, Jawaharlal Nehru University (JNU) zirlai panga zinga pahnih, Umar Khalid leh Anirban Bhattacharya-te chu Thawhlehni zan khan police kutah an inpe.

Khalid leh Bhattacharya-te hi hun eng emaw chen an bibo hnuah Pathianni zan khan university campus-ah an kir a, mahse campus chhungah police-te luh an phalsak loh avangin an man thei lo a ni. Delhi High Court-in police-te kutah inpe tura a hriattir angin an inpe ta a ni.

Thawhlehni zana dar 11.45 vel khan Khalid leh Bhattacharya-te hi university motor hmangin hruai chhuah an ni a, gate pawn lamah police team-ten lo nghakin police station an panpui nghal a ni.

Police-te chuan zirlai pahnihte hi darkar nga zet thu an zawtfiah a, man tuma an zawn laia an bihrukna hmunte an zawh bakah, February 9-a university campus-a firfiak Afzal Guru hriatrengna hun buatsaihtu zingah an tel leh tel loh te an zawt a ni. Police-te chuan zirlai dang pathumte pawh an inpek thuai an beisei thu an sawi.