Operation Ajay : Israel aṭangin mi 143 hruai haw leh

Israel-Hamas indona thleng mek avanga sorkar laipuiin Israel-a India mi awmte hruaichhuah hna a thawh mek, Operation Ajay hnuaiah a ṭum rukna atan thlawhtheihna hmangin mi 143 hruai haw leh a ni.

Pathianni zan khan thlawhtheihna hian Delhi Airport rawn thlengin, mi 143 hruai haw zingah hian Nepali pahnih an tel. Union minister of rural development Faggan Singh Kulaste chuan New Delhi Airport-ah a lo hmuak a ni.

Operation Ajay hnuaiah hian Israel aṭangin mi 1,200 hruai haw an ni tawh a, Nepali 18 an tel a ni. Ministry of external affairs chuan thlawhtheihna hi a ṭul angin tirh belh zel a ni ang tih a lo sawi tawh bawk.

MEA thupuangtu, Arindam Bagchi chuan sorkar laipui chuan indona thleng mekah Israel ram boruak pawh ngun takin a thlithlai reng tih a sawi. Israel-in Gaza a beihnaah India mi thi an awm loh thu leh, hliam tuar erawh pakhat a awm thu a sawi. An hriat theih chinah Gaza-ah hian India mi pali awmin, West Bank-ah 12-13 vel an awm tih a sawi. Heng mite hi Gaza aṭanga hruai chhuah erawh thil harsa tak a nih thu a sawi a ni. "Report ṭhenkhat chuan Gaza aṭang hian an chhuak tawh tihte an sawi a, mahse kan la finfiah thei lo," a ti.

Hamas-ten Israel an beih hnuah kha, Indian embassy chuan India mi awmte chu fimkhur tur leh, consulate-ah an hmingte thehlut vek turin a hriattir nghal a ni. October 11 khan sorkar laipui chuan India mite hruai hawna tur, Operation Ajay hi a kalpui ṭan a ni.

India hian indona thleng mek avanga harsatna tawk mek, Gaza Strip-a chengte ṭanpui leh chhawmdawlna tur pawh a lo thawn tawh a, a thil thawn zingah hian damdawi leh damdawi lam hmanrua bakah, tent, sleeping bag, tarpaulin, sanitary ulitily, leh tui tihthianghlimna tablet-te a tel.