Sri Lanka-in India khualzinte tan visa a thlawnin siamsak dawn

Sri Lanka foreign minister, Ali Sabry chuan an ram tourism ṭhanna tur atan, Sri Lanka cabinet chuan India leh ram dang paruk aṭanga khualzinte tan, a thlawna visa siamsakin Sri Lanka-a an zin theihna tur policy an pawm thu a puang. Sabry chuan Sri Lanka sorkar hmalakna chu enchhinna anga kalpui phawt an tum thu leh, March 31, 2024 aṭanga hman ṭan tur a nih thu a sawi.

Sri Lanka cabinet-in a pawm tak, ram pasarih aṭanga khualzinte visa a thlawna a lo siamsak theih zigah hian India bakah China, Russia, Malaysia, Japan, Indonesia leh Thailand te an tel a ni. Ruahmanna ang chuan heng ram aṭanga Sri Lanka kalte chuan a ram an thlen hunah pawisa ngai loin visa an siam thei dawn a ni.

India aṭanga kalte hi Sri Lanka-in khualzin a neih tam berte zinga mi an ni a, kumin September thla chhung pawh khan India mi Sri Lanka tlawhtu hi mi 30,000 an tling a, Sri Lanka-in khualzin a neih zawng zawng aṭanga 26% a tling pha a ni. Sri Lanka hian 2019 Easter Sunday-a biak-in bomb a nih aṭang khan tlawhtu a nei tlem ṭan a, an ram economy tla chhe nasa zual zel avangin an ram dinhmun siam ṭhatna turin kawng hrang hrang an dap mek a ni. Sri Lanka sum leh pai dinhmun chhiat chhanah hian mipuite chuan an president hlui Rajapaksa chu puhin bang tura an nawr hnuah a bang a ni.