ITBP-in an din cham an lawm

India leh China inrina veng tura din, Indo-Tibetan Border Police (ITBP) chuan nimin khan an din cham kum 61-na hmangin, prime minister Narendra Modi leh union home minister Amit Shah te'n lawmpuina thu an sawi.

PM Modi chuan ITBP-te huaisenna leh inpekna chu fakin,"ITBP din chamah hian ITBP mi leh sa zawng zawngte, in hnathawh avangin ka chhuang hle che u tih hi ka sawi duh. Ram himna atana hna pawimawh tak thawkin, chhiat tawhna thilah ni se ṭanpuina hna thawk bawkin theihtawp an chhuah ṭhin. Ram tan hian an hlu em em a, an theihna leh inpekna hi ram tan hian chhunzawm zel se tih hi ka duh em em a ni" tiin X-ah a tarlang. Amit Shah pawhin ITBP-te chu mihring theihna leh chhelna tilangtu an ni tawh tih sawiin,"An din chamah hian ITBP mi leh sa zawng zawngte zahna chibai ka buk duh che u. Hmun harsa leh boruak hrehawm ber ber karah chhel takin an hna an thawk zel a, mihringin a theihna sang bera ram a veng angin an theihtawp an chhuah a ni. Kan thlah lo la awm zel turte pawhin an inpekna ang hi inzir nan leh entawn atan rawn nei se a duhawm hle a ni" tiin a sawi ve bawk.

ITBP hi 1962-a India leh China indo avanga din a ni a, tunah hian ITBP hnuaiah hian sipai 90,000 awmin India leh China inrina, Line of Actual Control (LAC), km 3,488-a thui veng tur bika dah an ni. Ramri ven bakah hian ram chhung himna chungchang leh chhiat tawh thilah pawh an che chhuak bawk.