Railway board-in an hnuaia thawkte DA 4%-in tipung

Railway board chuan an hnuaia hnathawkte Dearness Allowance, basic pay aṭanga 42% ni ṭhin chu 46%-ah tipungin, hei hi July 1, 2023 chin aṭanga pek tur a nih thu an sawi.

Railway board hian October 23 khan All India Railways leh Production Unit-a General Manager leh Chief Administrative Officer te hnenah an thuchhuah siam hi thawnin, President-in Railway hnuaia hnathawkte tana 4%-a DA tihpunna a pawm tawh thu hi an tarlang a, basic pay chu 7th CPC rawtna sorkarin a pawm anga kalpui a nih thu an sawi bawk. Union Cabinet chuan Rs. vbc 15,000 bonus sem chhuah tur chu hmanni mai khan a lo pawm tawh a, hetah hian sorkar hnathawkte tana an DA 4%-a tihpunna hi a tel a ni.

All India Railwaymen's Federation general Secretary, Shiva Gopal Mishra chuan,"DA hi July thla aṭang khan sorkar hnathawkte pek tur a ni daih tawh a, a tang reng zawk a ni. Tlai deuh mah se Diwali hmaa hetiang thu hriat tur a awm erawh lawmawm ka ti hle," a ti. National Federation of Indian Railwaymen General Secretary, M. Raghavaiah pawhin DA chu Consumer Price Index mila pek a nih ṭhin thu leh, thil man sang tur venna atana hman theih a nih thu a sawi bawk. "Railway board-in tuna hetiang thu an puang hi a lawmawm em em, hetih lai hian January 2020 leh June 2021 inkara kan DA dawn tur, Covid-19 avanga sorkarin a tihtan kha dawng ngei turin kan la nawr chhunzawm tho ang," tiin a sawi.