FSSAI-in eitura QR code dah rawt

Food Safety and Standards Authority of India (FSSAI) chuan thlai leh ei tur lam thilah QR Code dah rawtin, khaw hmuh lama harsatna neite tan awlsamna a thlen dawn bakah, mi zawng zawng tana eitur him zawk lei theihna tur a nih tur thu an sawi.

FSSAI hnuaia Science and Standards Division Director, Amit Sharma chuan mimalin ei tur an ban phak leh lei theih huap zau taka siam chu khua leh tui an nihna anga an chanvo a nih thu sawiin, chu chu thuneitute pawhin an tum leh duhdan a nih thu a sawi a,"Mitdel mai bakah thil leitute zawng zawngin tu tan maha tih bik awm lo ei tur an lei theih nana eiturte chhinchhiahna siam hi a pawimawh hle a ni," tiin, FSSAI chuan Food Safety and Standards (Labeling and Display) Regulations, 2020 hnuaiah eitur reng renga chhinchhiahna pekin a ken tel tur dan a awm sa thu an sawi bawk a ni.

Eitura chhinchhiahna daha a leitute hriat tur ziah hian ei tur hming, dah ṭhat theih hun chhung, ei turin chaw chi hrang a pai, sa a tel leh tel loh, logo, siam a nih nana hman, allergy neite hriat tur leh tihmakmawha tel tur eng emaw zat a awm. Heng hi thil leitute'n an thil lei tura ngaihtuahna an sen thiam theihna tura puitu tur a ni. Hetiang chiah hian Rights of Persons with Disabilities Act, 2016 chuan rualban lote mamawh leh chanvo hre reng chunga an hriselna leh inenkawlna atana pui theitu tur ruahmanna siam turin a phut bawk. Thuneitute chuan he an rawtna hian rualban lo, a bikin mitdelte leh khaw hmuh lama harsatna neite tana awlsamna a siamsak tur thu an sawi. "Mitdelte tana awlsam siam a, an harsatna su kiang tur hian QR code hi ei tur zawng zawngah siam ni se, he QR code-ah hian danin min phut anga a leitute tana hriat ngai zawng zawng dah tel a nih bawk chuan hmasawnna nasa tak a ni ang," tiin an sawi a ni.