Parliament-ah Railway Budget 2016-17 pharh

Parliament Budget Session neih mekah, nimin khan Railway Minister Suresh Prabhu-an Railway Budget 2016-17 a pharh.

Minister Prabu hian Lok Sabha-a Railway Budget a pharh ṭum hnihna a ni a, rel chuan man leh bungraw phurh mante tihdanglam a nih loh bakah, rel chak chi super-fast train pathum lei thar a tum thu te, kum 2019-ah north-south, east-west leh east coast freigh corridor-te siam a ni dawn tih a sawi.

Kum 2016-17 atana sum hman tura ruahman chu cheng vaibelchhe nuai 1.21 a ni a, nikuma sum hman tur ruahman aṭang khan cheng vaibelchhe 8,720 a la chuang a ni. Kum nga chhungin infrastructure senso atan cheng vaibelchhe nuai 8.8 hman tum a ni a, sorkar laipui aṭangin ṭanpuina cheng vaibelchhe 40,000 beisei a ni. Kumin chhungin cheng vaibelchhe 92,714 sengin project thar 44 siam tum a ni tih minister chuan a sawi bawk. Nikum November thla aṭang khan cheng vaibelchhe 24,000 man contract pekchhuah a ni a, kumin chhunga Railways-in sum a lakluh tura beisei chu cheng vaibelchhe nuai 1.84 a ni.

Minister-in kumin chhunga project thar thawh tur a sawilan zinga ṭhenkhat chu -

Business travel route-ah double-decker rel tlantir a ni dawn

Assam-a Lumding-Silchar section chu tihlen a ni ang.

Kumin chhungin km 1,600 ah electric eng pek a ni ang a, kum tharah km 2,000 a thuiah pek tum a ni bawk.

Hmarchhak bial, a bikin Mizoram leh Manipur chu rel kawng lian, broad gauge hmanga thlunzawm a ni ang.

Ahmedabad-Mumbai-a rel chak chi tlanna tur kawng bika tlan tur rel tihfel a ni ang.

Kumin chhungin rel kawng lian, broad gauge km 2,500 phah zawh hman tum a ni a, hei hi kum hmasa lam aiin 30% in a thui zawk dawn a ni.

Railway Budget 2016-a tarlan tlangpuite

Rel chuan man leh bungraw phurh man tihsan a ni lo

Rel chak chi pathum - Humsafar Express, Tejas leh Uday-te tlantir a ni dawn.

Bungraw phur leh khualzin phur rel tlan chak zawng chu kum nga chhung atan darkar khatah km 25 a ni.

Nikuma budget-in hmalakna tur a tarlan 139 te chu thawh ṭan an ni tawh

Mihring enkawl loh rel kawng kanna siamte chu kum 2020-ah ṭhiah fel fai an ni ang

Swacch Bharat hnuaiah biotoilet 17,000 chu financial year tawp hmain rel station 475 ah siam hman a ni ang.

Tar leh hmeichhiat quota tihpun a ni dawn. Tar te puala lower berth quota siam chu 50% a tihpun a ni dawn.

Kumin chhungin rel station 100 ah Wifi pek a ni ang a, kum tharah station 400 ah pek a ni ang.

E-ticketing sytem chu 2,000 tickets/min aṭangin 7,200 tickets/min ah tihpun a ni. He system hmangtu hi mi nuai 1.2 an tling tawh.

Rel station lian zawng zawngah a tahtawlin CCTV dah a ni dawn a, kum-in chhungin station 300 ah dah hman tum a ni.

Rel station-ah water vending machine 2,500 dah thar tum a ni.

Reservation nei lo khualzin, hmun hla zawk pan tumte tan Deen Dayal coach siam a ni dawn.

Rel chhunga ei tur sem chu IRCTC-in a tahtawlin an in enkawl chhawk ang. Tualchhung chawhmeh hrang hrangte lam theih tura siam a ni ang.

Toilet thenfai hna chu SMS hmangin ngenna siam theih a ni ang.

Nu, naupang hruaia zinte tan a hranin naupang leh nausen ei tur siam a ni ang.

Rel pindanah GPS-based digital-in rel station an pan mek te tarlan zel a ni ang.

Kum nga chhunga railway infrastructure thuam ṭhatna atan cheng vaibelchhe nuai 8.5 ruahman a ni.

Vadodar-a National academy of Indian railways chu university puitlinga hlankai a ni ang.

Coolie-te chu Sahayak tia koh an ni tawh ang.

Railway-a thawkte tan uniform thar siam a ni dawn.

Railway borad chu thuamṭhat a ni dawn a, chairman pawh thuneihna tam zawk pek a ni ang.

State 17-ten Indian Railways nena thawk duna rail-over-bridge siam an remti.

Cheng vaibelchhe 40,000 sengin locomotive factory pahnih siam a ni dawn.