Eptuten thupha chawi turin Irani an phut

Human Resource Development (HRD) Minister Smriti Irani-i Rajya Sabha rorel inkhawmah Hindu pathiannu, Durga chungchang sawichhiatna lehkha a chhiar chhuah avangin nimin khan eptute chuan thupha chawi turin an phut.

Ningani khan Rajya Sabha inkhawmah Jawaharlal Nehru University (JNU) buaina chungchang sawiho a ni. Ram phatsan leh hela puha JNU zirlai ṭhenkhat man an nih chungchanga zawhna a chhannaah, Education mnister chuan campus chhunga lehkha them an sem nia sawi chu a chhiar chhuak a, hetah hian pathiannu Durga sawichhiatna thute a chuang a ni.

Durga chungchang mawi lo taka ziahna a chhiar chhuah avang hian eptute chuan thupha chawi turin minister hi an phut a, Rajya Sabha Deputy Chairperson JP Kurien pawhin eptute ngen angin, Ningani-a an debate record chu ennawn leh a tiam. Kurien chuan debate-ah hian sakhaw sawichhiatna lam hawite a lo awm a nih chuan paih a nih tur thu a sawi bawk.

Minister chuan eptute phutna hi chhangin, "Thil thlen dan dik tak sawi ka duh avangin an lehkha sem pawh kha a vaiin ka chhiar chhuak mai a ni. Rilru na tak chungin ka chhiar a ni. Hindu sakhaw zuitu leh Durga betu ka ni" tiin a sawi.

Hetihlai hian Congress hruaitu Anand Sharma chua, "Pathian leh zawlneite chungchang mawi lo taka sawi chu pawmzam mai chi a ni lo. Minister hi man a, thubuai siamsak kan phut a ni" a ti.

Mahse sorkar laipui chuan minister hi chhanin, thupha a chawi pawh a ngaih loh thu a sawi.