JNU chungchangah Lawyer leh Police-te hriattirna pe

Supreme Court chuan kar kaltaa Delhi-a Patiala House Court-a Jawaharlal Nehru University (JNU) zirlai pawl hruaitu Kanhaiya Kumar chungthu ngaihtuah a nih dawna tharum thawhna thlenttu, lawyer pathumte chu nimin khan hriattirna a pe.

Supreme Court hian sorkar laipui leh Delhi Police-te chu lawyer pathumte Special Investigation Team chhui chian tir ngenna thehluh chungchang chu chhang turin a hriattir bawk.

Lawyer pathum - Vikram Chauhan, Yashpal Singh leh Om Sharma te chu Patiala House-a Kanhaiya Kumar hruai a nih ṭumin Kumar leh amah thlawptu, JNU zirlai leh zirtirtute bakah journalist-te kut an lo thlak a, kut an thlak hei hi TV footage-ah pawh hmuh tur a awm. Kut an thlak bakah TV hmaah Kumar-a an khawih theih nan jail-a tan pawh an inhuam thu an sawi a, an invaupung laite pawh a hnuah India Today TV chuan a tichhuak leh a ni.

Zirlai leh journalist-te kut an thlak avang hian lawyer pathumte lakah thubuai thehluh a ni a, court chu thu zawhfiah tura a koh hnuah bail-in a chhuahtir leh nghal a ni. Senior lawyer Prashant Bhushan chuan February 15 leh 17-a lawyer ṭhenkhatin Patiala House Court-a tharum thawhna thlen dan hi special investigation team chhuitir a phut bawk.

Lawyer-te hian JNU campus-a zirlai ṭhenkhatin India dodalna leh India laka helna thu an sawite an duh lohna entir nan leh, hetiang thil a thlen nawn tawh lohna turin zirlai, zirtirtu leh journalist-te hi kut an thlak niin an sawi. Supreme Court chuan lawyer-te thubuai hi March 4 ah a ngaihtuah ang.