Police station-ah DNA leh hmel mil zawnna khawl hmang dawn

Sorkar laipui chuan Criminal Procedure Identification Act (CrPI) pass a nih aṭanga kum khat a liam hnuah misual zawn chhuahna atana police station-a hman tur, DNA leh hmel mil zawnna khawl chu chhawp chhuah a ni dawn tih a sawi. Ram chhunga police station 1,300-ah te hman a ni phawt dawn a, he danin a huam chin leh hman dan tur dik tak erawh chu la duan leh tur a ni.

Parliament-in April 2022-a a pass, he dan hnuaiah hian police leh central hnuaia hnuchhuitute chuan an mi mante taksa pawn lam leh chhung lam (physical leh biological) kaihhnawih sample hrang hrang leh mit mu leh mit note thla lakte an dah ṭha thei dawn a ni. He dan kengkawh tura ruat, National Crime Records Bureau (NCRB) te chu record lak khawm a nih laia police-te zawm tur inkaihhruaina duang tura tih an ni bawk. NCRB chuan police-te'n an hman hmanrua leh kalphung chu khawl a ni emaw, dan angin a ni emaw, forensic zawnga teh pawhin a felfaiin pawmpui a ni tur a ni an ti a, data an lak leh dah ṭhatte chu hman sual a awm theih avangin a hmang theitu dik tak official ruat chauhin hmang thei se an duh thu an sawi tel bawk. DNA lak leh hmel milna khawl hmante chu sawi ni chiah lo mah se, state police leh NCRB chuan police station 1,300, commissionerate leh state headquarters-a Special Investigation Unit-ah te hman tura chhawp chhuah a nih tur thu an sawi.

Hemi chungchangah hian Ministry of Home Affairs chuan a hlawhtlin theihna tur atan state police aiawh, central law enforcement agency leh mi ṭhenkhat telna domain committee an din thu sawiin, inkaihhruaina tur duang tura technical sub-committee pawh an din thu an sawi bawk. State-te chu heng khawl, Measurement Collection Unit (MCU)-te dahna tur hmun lo thlang fel turin MHA chuan an hriattir a ni.