I&B Ministry-in cable TV operator 477 registration titawp

Information and Broadcasting (I&B) Ministry chuan cable TV hrang hrang pe chhuaktu Multi System Operators (MSOs) 477-te registration chu titawpin, dan an zawm loh vang leh, dan bawhchhiat an neih vang a ni tih a sawi.

I&B ministry chuan MSO registration neih nana inremna ziahah chuan MSO te chuan Cable Television Networks (Regulation) Act-in inkaihhruaina a siam an zawm a ngaih thu sawiin, "Inremna ziah ang zawm a nih loh chuan registration hi tihtawp leh dan lailawk theih a ni. MSO te hi an subscriber list theh lut tura hriattir an ni fo a ni. Inkaihhruaina dan 15(1)-ah chuan channel pe chhuaktu zawng zawngte hi calender year khat chhunga an kal dan vawi khat tal ennawnna nei tura phut an ni bawk" tiin an tarlang. Ministry chuan telecom Regulatory Authority of India (TRAI) hnen aṭanga thu an dawn danin MSO te hian 2021 leh 2022 khan an kalphung ennawnna hi an nei lo tih hriat a ni a, Cable Television Networks (Regulation) Act-in a phut anga seeding date angte theh lut tur an nih laia an tih loh bawk thu an sawi a ni.