Uttarakhand-ah India leh Nepal citizenship nei kawp an tam

Uttarakhand-a Almora region-a Sashastra Seema Bal (SSB) deputy inspector general D.N Bhombe chuan India leh Nepal inrina, Pithoragarh leh Champawat district vela chengte zingah citizenship pahnih, India leh Nepal citizenship nei kawp eng emaw zat an awm tih an hriat thu leh, sorkarin chung mite zawn chhuah hna chu a thawh mek thu a sawi.

Bhombe chuan,"Khua leh tui nihna pahnih nei hi Pithoragarh Jhulaghat leh Champawat district, India leh Nepa inrina velah an awm nual tih kan hria a, district thuneitute pawh hemi chungchang hi hriattir an ni tawh. Uttarakhand-a border outpost 54-a SSB mi leh sa tirh chhuahte chuan India rama khawsa si, Nepal khua leh tui nihna neite zawn chhuah hna hi an thawk mek bawk a ni," tiin, district thuneitute nen an thawh dun thu a sawi. SSB chuan ramri khuaa chengte chu uluk taka an vil reng thu leh, khaw dinhmun an thlithlai reng thu sawiin, pawn lam mi lo lut thar an awm em tihte pawh an ngaihven reng a, ramsa leh ruihhlo leh ramsa taksa peng te thlenga tawlhruk ṭhin chu an ven thu leh, human trafficking veng tura special team an din thu a sawi bawk a ni.

Pithoragarh deputy district megistrate, Anil Kumar Shukla chuan India rama cheng Nepalese chu chi hnih an awm thu sawi ve bawkin, hmeichhiain pasal a neih avanga India-a cheng ta an awm thu leh, chhungkuaa Nepal aṭanga India-a rawn pem hrim hrim an awm thu sawiin, heng mite hian Nepal khua leh tui an nihna an hlih si loh avang leh India khua leh tui nihna an dil bawk si loh avangin hmalak dan tur a buaithlak ṭhin thu a sawi."Aadhar card leh voter ID lem siam tam tak kan man tawh a, heng document lem kan mansakte chu kan tihtawpsak nghal zel ṭhin," a ti.