NCERT zirlaibuah 'India' aiah 'Bharat' hman tum

National Council of Educational Research and Training (NCERT) chuan high-level committee dinin, he committee hian school-a social science zirlaibu en nawn a, zirlaibua India tih chu Bharat tiha thlak turin rawtna an siam. NCERT chuan committee rawtna chu an la pawm loh thu leh, thutlukna siam tur chuan a la hma lutuk niin an sawi.

NCERT hnuaia high-level committe-ah hian ICHR chairperson, Raguvendra Tanwar, JNU professor, Vandana Mishra leh archaeologist, Vasant Shinde, Deccan College Deemed University Vice-Chancellor hluite an tel a ni. Shinde chuan committee-in NCERT hnena an rawtna chu thla li liam ta khan an theh luh tawh thu sawiin, zirlaibua India tih chu Bharat tia thlakna tur pawh pawm a ni tawh niin a sawi. Hei bakah zirlaibu zawng zawngah hian dynasty pahnih khat mai zir duh tawk lo a, India lo awp tawhtu dynasty zawng zawngte tana a inzata hmun pek te rawt a nih thu a sawi tel bawk. Shinde chuan,"Panel member zawng zawngin India tih aia Bharat hman rawtna hi an pawm vek a ni. Hei bakah hian ram chhunga thil hmuh chhuah tharte pawh syllabus-a telh ve zel turin pawm a ni bawk," a ti.

Hetih lai hian NCERT erawh chuan syllabus tihdanglam tumna chu thil kal mek a la nih thu sawiin,"NCERT zirlaibua India tih chu Bharat tia thlak vek tum niin chanchinthar velah hmuh tur a awm. Syllabus leh textbook thlak tum hian hmalakna kalpui mek chauh a ni a, hemi atan hian kil hrang hrang aṭangin mithiam bikte pawh rawn mek zel an ni. Chuvangin chanchinthara kan hmuh ang a, India tih aia Bharat hman tumna chungchang hi thui tak sawi theih a la ni lo a ni," tiin X-ah an post.

Thla hmasaa G20 summit dinner atana India-in sawmna a thawn chhuahah khan India tih aiah Bharat hman a ni tawh a, hei hian boruak siam chhoin, eptu party-te chuan nasa takin an sawisel. RSS-te thil tum pakhat a nih avangin eptu party-te chuan India tih aia Bharat hman hi an duh loh thu an sawi a ni. Eptu party-te hian NCERT hmalakna pawh sawiselin, NCERT chu zirlaibu hmanga India history thlak danglam tumah an puh a, Congress senior leader KC. Venugopal chuan,"India-Bharat tih vel hi ka hre hrang ngai lo, kan tan chuan India emaw Bharat tih hi a inang reng, history thlak tum kher hi a ṭulna ka hre lo, in thinlung tak taka ti pawh in ni lo," tiin NCERT chu a chhal a ni.

NCERT panel hi history professor bang tawh, CI Isaac kaihhruai a ni a, ani hi Sangh Parivar zirtirna nena inzawmna ṭha tak nei nia hriat a ni. Isaac hian India tih hming aia Bharat tih hman rawtna an thlen hian primary aṭanga high school zirlaibu thlenga huamtir an duh thu a sawi bawk.