India-in Canada mite tan visa ṭhenkhat hawng

Canada-a Indian High Commission chuan Canada mite tan visa ṭhenkhat; sumdawnna, medical leh conference thil atana dilte chu an pawm leh tawh tur thu a puang. Hetih lai hian khualzin visa leh e-visa te chu hawn a la ni lo thung.

Ottawa-a Indian High Commission chuan thuchhuah siamin, "Buaina leh harsatna awm thei chi hrang hrangte uluk taka ngaihtuah a nih hnu leh, Canada hmalaknate thlir telin visa ṭhenkhat hawn leh tawh chu ṭha kan ti a ni," a ti. Emergency thil bik chu ngaihtuah chawpa thutlukna siam chawp zel tur a nih thu te, khualzin visa leh e-visa te chu hawn a la nih rih loh thute tarlan a ni.

External affairs minister S. Jaishankar chuan October 22 khan Canada mite tana India visa hawn leh thuai a nih tur thu hi a lo sawi lang tawh. India palaite'n vauna an tawh avang leh an sahimna atana visa titawp an nih thu an sawi hnuah Canada sorkar chuan venhimna khauh zawk pek belhin, Canada hmalakna avang hian India hian visa ṭhenkhat hi hawng leh ta nia ngaih a ni.

Canada leilunga Khalistan firfiak, Hardeep Singh Nijjar thah a nih khan Canada prime minister, Justin Trudeau chuan India chu inrawlhna neiah a puh a, hei vang hian India chuan September thla khan Canada visa te chu a lo titawp lailawk a ni. Kar hmasa khan India-a Canada embassy aṭangin hnathawk mi 41 te chu India-in a hriatpuina tihtawp a tum avangin koh haw an lo ni tawh bawk.