Law Commission-in ONOE kalpui dan tura ruahmanna siam a pharh

Law ministry-in One Nation, One Election (ONOE) hman a nih dan tur leh kalpui dan turte zir chiang a, rawtna siam tura a ruat, Law Commission chuan a ruahmanna siamte President kaihhruai panel hmaah an pharh.

Law Commission-in ruahmanna a siam zingah, a ruala election neih a nih theihna atana constitution siam ṭhat a ngaih thu a tarlang tel a ni.

Law Ministry hian President kaihhruai panel hi High Level Committee (HLC) on One Nation, One Election tih a nih tawh tur thu puang bawkin, ONOE chungchang ngaihtuah tura din panel member aṭanga Lok Sabha Congress party leader, Adhir Ranjan Chowdhury banna theh luh an pawm thu an sawi bawk.

HLC hian an meeting hmasa berah hian political party hrang hrangte ngaihdan lak a tum chu bawhzui nghalin, ONOE chungchanga an ngaihdan zawhna national party paruk, state party 33 leh registered unrecognised party pasarih hnenah an thawn a ni.

ONOE hman a nih theihna atana zir chianna leh rawtnate siam hi Law Ministry hian Law Commission kutah a dah a, Law Commission rawtnate hi President kaihhruai panel, HLC hian a pawm ve leh a ngai dawn a ni. ONOE hmang hian Lok Sabha inthlan te, assembly inthlan te, panchayat leh municipal inthlante a ruala neih vek theih dan tur kawng zawn a ni. Tun dinhmunah rawtnate hi pawm vek theih a la ni rih lo a, final report pawh siam a la nih loh avangin Law Commission hian 2029-a Lok Sabha inthlan ruala assembly inthlan neih a nih theihna tur atana term ṭhenkhat pawhsei leh tihtawi dan kawng an zawng mek niin an sawi.

High Level Committee on One Nation, One Election meeting-ah hian union home minister Amit Shah bakah, Rajya Sabha opposition leader hlui Ghulam Nabi Azad, law minister Arjun Ram Meghwal, 15th finance commission chairman hlui NK Singh, Lok Sabha secretary general hlui Subhash C. Kashyap, senior advocate Harish Salve leh chief vigilance commissioner hlui Sanjay Kothari te an tel bawk a ni.