Omar Abdullah-a'n J&K-a inthlan huaihawt ngam loah BJP sorkar puh

National Conference (NC) hruaitu, Omar Abdullah chuan central-a rorel lai, BJP chu Jammu and Kashmir-a inthlan huaihawt ngam loah puhin, huaisenna an tlakchham vang a ni, a ti. Parliament inthlan pawh a ṭulna avang chu ni lo se inthlan an neih loh mai a rin thu a sawi.

Abdullah chuan,"BJP sorkar hian Supreme Court-ah urban local body leh panchayat inthlante neih a nih tur thu sawi mah se notification erawh chhuah a ni lo. Kargil (LAHDC-Kargil) poll-a an harsatna tawhte hian Jammu and Kashmir pum a nghawng dawn niin a lang. Assembly inthlan hnuhnung ber chu 2014 daiha neih tawh kha a ni a, Governor rorelna hnuaiah hian kum nga kan awm tawh. 2019 hnuah hma lam kan pan hret tawh anga sawi siin enga tinge inthlan hi an la buatsaih si loh?" a ti. Inthlan buatsaih a nih loh chhan chu BJP-in inthlan hmachhawn an huphurh vang niin a sawi a, mipuiah inrintawkna tuh mah se an hruaitute zingah hlauhna a awm a ni, a ti bawk. "Mipui thlekna lam an hre chiang a, Lok Sabha inthlan pawh hi a ṭulnain nawr lo se chu neih loh an duh hial ang, an tih ngei ngei ngai a nih avang zawkin an buatsaih dawn chauh zawk a ni," tiin chanchinthar lakhawmtute hmaah a sawi.

"Thil pakhat chiang deuh chu Lok Sabha inthlan neih a nih hma chuan urban local body emaw, panchayat emaw, BDC, DDC, state assembly inthlan pawh, a engmah hi neih a ni rih dawn lo a ni. LAHDC-Kargil-a inthlan result avang khan hlauh an nei a ni. NC leh Congress ṭangkawpin hnehna an chang si a, independent-a tling pahnih lah khan min thlawpna an sawi bawk si," tiin, inthlan chu tihkhawtlai reng theih a nih dawn loh thu leh, NC-in sorkarna an siam hunah chuan ni tina inhlawh ṭhinte dinhmun siam ṭhat a tum thu a tarlang.