Ramri inkahna a tawp hnuah khaw mite'n an in lam pan

Pakistani Rangers (PR) leh Border Security Force (BSF) te October 26 zana ramri ep aṭanga an inkah avangin International border-a awm, Jammu district-a, Arnia leh RS Pura sector-a cheng mi eng emaw zat chu an tlanchhia a, inkahna a tawp tawh thu BSF offcicial-te'n an puan hnuah mipuite hian an in leh lo an pan leh tawh a ni.

BSF chuan Pakistani rangers te hian chhan leh vang awm loin India ramri lamah hian silai an kap ringawt niin an sawi. International Border-a India sipai post pangate chu kah an ni a, BSF-te hian an chhang let ve nghal a ni. Pakistan lam silai hmeh puah avang hian BSF sipai pahnih leh hmeichhe pakhat hliam tuar an awm a, damdawi ina dah nghal an nih thu leh, October 27 zing lam thlenga an inkah thu BSF chuan an tarlang. .

Pakistan rangers-te hian machine gun lian an hman bakah, 82 leh 120 mm mortar an hmang bawk. Hei vang hian ramri hnaia awm, Arnia, Treva, Suchetgarh leh Jabowal-a cheng mi eng emaw zat chu hmun him lam panin an tlanchhia a ni. Ramri khuaa chengte chuan hetianga inkahna hi hun rei tak an hriat ngai tawh loh thu leh, inkahna thleng ta thut avanga an hlauh thu te, temple leh bunker-ah te sahimna zawnga an bihruk thu an sawi.

India leh Pakistan hian February 25, 2021 khan Jammu and Kashmir leh sector dangah pawh, Line of Control (LoC) chinah reng reng inkap lo turin inkahhai puangin inremna an ziak a, mahse, tun hi October thla chhunga Pakistan-in inkaihhai a bawhchhiat ṭum hnihna a ni tawh. Pakistan hian October 19 khan international border vek, Arnia sector-a Vikram post a lo kap tawh a ni.