India mi 8 Qatar-ah thi tura hremna pek an ni

Qatar court chuan Indian Navy-a ṭang ṭhin mi pariatte chu enthlatua puha manin thi tura hremna a pe. Heng Indian Navy hluite hi August 2022 khan Qatar enthlatua rinhlelh thilah man niin, kumin March 25 khan an lakah thubuai theh luh a ni a, an chungthu ngaihtuah a nih chhung hian khung hran an ni bawk. Qatar court of first instance chuan Ningani khan heng Indian mi pariatte hi thi tura hremna a pe ta a ni.

Qatar court-in thi tura hremna a pek Indian navy hluite hi Commander Purnendu Tiwari te, Commander Sugunakar Pakala te, Commander Amit Nagpal, Commander Sanjeev Gupta, Captain navtej Singh Gill, Captain Birendra Kumar Verma, Captain Saurabh Vasisht leh Sailor Ragesh Gopakumar te an ni. Heng mite hi Navy aṭanga an chawlh hnuah Qatar armed force-te tana training leh thil dang pea zirtir ṭhin private firm, Dahra Global Technologies and Consultancy Services tan an thawk hlawm a. He company hi Royal Oman Air Force squadron leader bang, Khamis al-Ajmi ta niin, Ajmi pawh hi man a ni ve a, mahse, November 2022 khan chhuah a ni thung a ni. Man an nih chhan hi Italian technology ṭanpuinaa siam, submarine tê, intibo thei tura duan an siam chungchangah a ni.

Hemi chungchangah hian Ministry of External Affairs chuan dan anga hma an lak theihna tur kawng an dap thu sawiin, court thutlukna siam kimchang zawk an la nghak mek bawk niin an sawi.