Thla hnih hnuah thlawhtheihna thlawh tir leh ṭan
State sorkar ṭhenkhatin sorkar laipui hmalakna thlawp lo mah se, thla hnih hnuah nimin zing aṭang khan ram chhungah thlawhtheihna thlawh tir leh ṭan a ni.
Nimina thlawhtheihna thlawk chhuak hmasa ber hi Delhi aṭanga Pune pana thlawk niin, zing 4:45-ah a chhuak. A dawtah hian Mumbai aṭanga Patna pan chu a thlawk chhuak leh a, he thlawhtheihna hi nimin zing dar 6:45 khan a thlawk chhuak bawk.
Aviation industry chuan Delhi airport aṭanga thlawk tur thlawhtheihna 82 a awm tih a tarlang a, mahse thlawhtheihna hi eng emaw zat cancel leh a ni thung.
Nimin aṭang khan Mumbai leh Telangana-ah hian thlawhtheihna nitin 30-50 thlawh tir phal a ni a, mahse Maharashtra chuan sorkar laipui hnenah an state chhungah thlawhtheihna a tlem thei ang bera thlawh tir turin a ngen.
Pathianni khan West Bengal sorkar chuan an state-a thlipui tleh vangin May 27 thleng thlawhtheihna thlawh a khap a, mahse May 28 aṭangin nitin thlawhtheihna 20 chu an state-a thlawh tir a phal tur thu a sawi. Andhra Pradesh pawhin an state chhunga thlawhtheihna luh hi a la khap bawk.
Kar kal ta khan civil aviation ministry chuan ram chhunga thlawhtheihnate chu May 25 aṭangin thlawh ṭan tir phal a nih thu thuchhuah a siam a, inkaihhruaina uluk takin a duang nghal bawk a ni. He inkaihhruaina hnuaiah hian airport-ah an bungrua phuhfaisak an nih tur thu te, infrared thermometer-a an khawsik leh sik lo enfiah a nih tur thu te, passanger-te chu hmaituamna vuah vek tura tih an nih thu te, thlawhtheihna chhunga ei tur sem a nih loh tur thu leh Aarogya Setu app hmang tura hriattir an nih thute tarlan a ni.
State ṭhenkhat chuan thlawhtheihnaa haw te chu airport-ah quarantine an ni dawn tih an tarlang a, ṭhenkhatin in lama quarantine an nih tur thu an tarlang thung.
Thawhṭannia ram chhunga thlawhtheihna thlawk tur hi 1,050 a ni a, mahse Pathiannia state sorkar ten an ngaihtuah ṭhat leh hnuah airport ṭhenkhat chu khar chhunzawm a ni a, hei vang hian flight eng emaw zat cancel niin khualzintens harsatna an tawh phah a ni.