Afghanistan-a Indian Consulate bei

Afghanistan khawchhak lam, Jalalabad khuaa Indian Consulate bulah nimin khan bomb tihpuah a nih bakah, silai hmehpuah zui a ni bawk.

Firfiak panga-te chuan consulate compound chhungah grenade an vawm a, a hnuah a bula building-ah an tlanlut nghal a ni. Consulate vengtu, Indo-Tibetan Border Force Police (ITBP) leh Afghan security force-te chu firfiakte nen an inkap zui. Hun eng emaw chen an inkah hnuah security force-te hian firfiakte hi an vaiin an kaphlum a ni.

Bomb puak hian consulate bula in eng emaw zat a tih chhiat bakah, kawngka leh tukverh darthlalangte a ti keh a, car pariat a chhe tel bawk. Security force leh firfiakte inbehnaah hian mi 19 in hliam an tuar a, hliam tuar zingah hian civil mi pawh an tel. Indian Consulate-a thawkte chu an him vek nia sawi a ni.

Nimin tlai thleng khan eng pawl mahin pawikhawihna thlentu an nih thu hi an la sawi lo.

January thla khan Jalalabad khuaah vek hian Pakistan consulate chu beih a lo ni tawh bawk a, Islamic State (IS) firfiak pawl chuan an tih niin an chhal.