Delhi-a CCTV dahna turin Rs vbc 600 dil

Delhi public works department (PWD) chuan Delhi khawpui chhunga CCTV camera leh street light dahna turin Delhi sorkar hnenah cheng vaibelchhe 600 a dil.

PWD chuan Assembly budget session neih tura CCTV leh street light dahna tur sum hi finance department aṭanga pe turin a ngen. Assembly session neih hun tur hi puan la ni lo mah se, March 22 aṭang hian neih
ṭan theih beisei a ni.

Official chuan budget session hian ni nga vel a awh dawn niin an sawi a, budget chu March 28-ah pharh tum a ni tih a sawi.

Chief Minister Arvind Kejriwal-a kaihhruai Delhi sorkar hian PWD hnenah khawpui chhunga hmun hrang hrangah CCTV camera dah tur leh, street light te dah turin a lo hriattir tawh a, hei hi inthlan dawna khawpui chhunga hmeichhiate himna tura hmalak a lo tiamna pakhat a ni.

Nikum khan Kejriwal-a kaihhruai sorkar hian a ṭum khatna atan budget a lo siam tawh a, hetah hian education lam chu dah pawimawh ber a ni. Kumin budget-ah chuan health sector lama dah pawimawh dawn nia sawi a ni a, kum kallai mekah health sector atan hian cheng vaibelchhe 4,877 dah a ni a, heng zing-a cheng vaibelchhe 3,138 chu plan hnuaiah dah a ni a, health budget punna hi 45% zet a tling.