Karti Chidambaram vangin Parliament inkhawm buai

Parliament inkhawm chu nimin khan a ni hnihna atan Union Minisr hlui, P Chidambaram-a fapa, Karti Chidambaram avangin rorel thei loin member te an au buai leh.

Nimina Lok Sabha inkhawm ṭan a nih veleh, AIADMK member-te chu House laiah chhuak khawmin, Aircel-Maxix buaina chungchanga inhnamhnawiha puh, Karti Chidarambaram-a lakah action la turin sorkar an phut a ni.

Member-te an au buai hnuah, Parliamentary Affairs Minister M Venkaiah Naidu chuan sorkar chuan hemi chungchang hi sawiho a duh a, a ṭul anga action lak pawh a tum tih a sawi. Speaker Sumitra Mahajan-in Question Hour zawh hnuah sawiho a phalsak thu a sawi tak avangin AIADMK member-te hian an ṭhuthmun an pan leh nghal a ni.

Mahse hemi hnu hian Congress member-te chuan Speaker thutlukna siam hi duhloin, House laiah an kal khawm ve leh. Congress hruaitu Mallikarjun Kharge chuan eng vangin nge Speaker chuan a phalsak theih tih a zawt let ve thung. Congress leh party dang member-te chuan Human Resource Development Minister Smriti Irani-in Dalit zirlai, Rohith Vemula intihlhum chungchangah House-ah thu dik tawk lo sawia an puhna chu sawiho an duh thu an sawichhuak. Karti Chidambaram chung-chang sawiho tura rawtna siamah sorkar laipui leh eptu pawl ṭhenkhat chuan inremna an siam niin an puh.

AIADMK member-te hian Thawhlehni khan Parliament inkhawmah chanchinbu pakhatin Karti Chidambaram-an khawvel ram hrang hrangah sumdawnna lian tak tak a din thu leh, hei hi Enforcement Directorate leh Income Tax thuneituten a in an dap
aṭanga an hriatchhuah thu a ziahna copy-te an lo lek-chhuak tawh a ni. Mahse Karti chuan thuchhuah siamin, a sumdawnna te chu dan ang thlapa a kalpui thu a sawi.