Kanhaiya Kumar bail-in chhuah tir

Ram dodal leh sorkar laka hel zawnga thusawia puh, Jawaharlal Nehru University (JNU) Students' Union President Kanhaiya Kumar chu Delhi High Court chuan thla ruk chhung atan interim bail a pe.

Justice Pratibha Rani kaihhruai bench chuan Kanhaiya Kumar bail dilna hi ngaihtuahin, Rs 10,000 dahkham tur leh, ram dodal zawng thiltihnaa tel tawh lo tura hriattirin a phalsak a ni. Hei bakah hian JNU zirlai pawl hruaitu a nih angin university campus chhunga ram dodal zawnga thiltih awm turte a theih anga veng turin a ti bawk. Thla ruk hnuah Kanhaiya hian bail hi a dil nawn leh a ngai dawn a, court chuan a chhuah chhunga a khawsak dan te thlirin a ngaihtuah ṭha leh dawn a ni.

Kanhaiya Kumar hian bail a dilna lehkha a thehluhah hian JNU campus-a India dodal zawnga thusawi leh aurualnaah a tel loh thu te a tarlang a ni.

February 9-a university campus-a zirlai ṭhenkhatin firfiak Afzal Guru hriatrengna hun an siamah India dodal leh sorkar laka helna lam thute sawi a ni a, he inkhawm buatsaihah hian Kanhaiya hi a tel ve nia sawiin February 12 khan man a ni. A ni bakah hian JNU zirlai pahnih, Umar Khalid leh Anirban Bhattacharya-te pawh man an ni bawk.

JNU thuneitute chuan zirlai pawl president chhuah a ni ta chu university tana thu lawmawm tak a nih thu an sawi. JNU Registrar Bhupinder Zutshi chuan, " Chanchin lawmawm tak kan hria chu kan lawm hle a ni. Dan ang takin ro rel zel ni rawh se. Kanhaiya chhuah tir a ni hi zirlaite leh university tana thu lawmawm tak a ni a, campus boruak pawhin ngai a awh chhoh ngei kan beisei" a ti.

Kanhaiya Kumar man a nih hnu hian JNU zirlaite chuan lungawi lohna an lantir a, court-a hruai a ni pawhin zirlai ṭhahnem takin an ṭawiawm a ni. Ram dodal zawnga thu sawia puha thubuai siamsak a ni pawh dik lo taka phiarrukna niin an sawi.

Delhi Police-te chuan jail aṭanga Kanhaiya chhuahtir a nih hnuah zirlaiten buaina an siam venthawn thilah venhimna khauh zawka kalpui an tum. JNU leh Delhi university campus chhehvel chu uluk zawka ven a ni dawn tih an sawi a, district police commissioner te chu Kanhaiaya kalna apiangah security leh traffic police-te pe zel tura hriattir an ni. Kanhaiya hi chhuah zalen a nih hnuah hmun hrang hrangah thusawia sawm a nih ngei rin a ni a, hei hian Left student group leh BJP zirlai pawl, ABVP inkarah buaina a thlen phah mai a hlauhthawn awm hle niin police-te chuan an sawi.