JNU zirlai ten Sedition Law paih an phut

Jawaharlal Nehru University (JNU) zirlai te chuan nimin khan Parliament panin kawng an zawh a, sorkar dodal nia puhna dan 'Sedition Law' ṭhiah an phut.

Zirlaite hi Mandi House kawt aṭangin chawhnu lam khan an chhuak a, JNU-a thil thleng an duh loh zia lan tirin an aurual a ni. Police te chuan Parliament kawtah an lo dang.

JNUSU vice president Shehla Rashid Shora chuan, Sedition Law chu dan hlui lutuk a ni a, democracy ram khawiah mah hman a nih ve a rin loh thu sawiin, sorkar chu he dan hlip vat tura an ngen thu a sawi. India ram chhung zirna hmun hrang hrangah chi leh chi in-thliarna tihbo a nih theih nan 'Rohith Vemula Act' hmang thuai turin sorkar an ngen tih a sawi bawk.

He kawng zawh hi Delhi-a University hrang hrang Delhi UNiversity, Jamia University leh Ambedkar University zirlai leh zirtirtu ten an zawm a ni. Heng bakah hian Hyderabad University hostel-a inawkhlum Vemula chhungte bakah India dodal zawnga chea puh JNU zirlai Umar Khalid pawh a tel.

Umar Khalid-a pa Syed Qasim Ilyas chuan thu sawiin,"Nationalism chuan midangte hma-ngaih thei turin min zirtir a, nimahsela nationalism in a tum tak zawk erawh kan hrethiam lo a ni" a ti. CPI(M) hruaitu Brinda Karat pawhin, Sedition Law chu sorkar-in diklo taka a mite lakah a hman chuan thil sual titua puh zawk chu a chawimawi a ni,a ti. Karat chuan, "Kan Party hruaitu pakhat pawh he thilah hian sorkarin a lo ringhlel tawh a, thu dik lo a nih avangin keini chuan chawimawina-ah kan ngai a ni", a ti. Kanhaiya Kumar hi February ni 12 khan India dodal zawng thusawiah puhin man a ni a, a chungchang ngaihtuahtu Delhi High Court chuan thla ruk chhung atan interim bail-a chhuah a phalsak a ni.