PM sawiseltu AAP MLA lakah thubuai thehluh

Delhi-a Aam Aadmi Party (AAP) MLA Amanatullah Khan chu Prime Minister Narendra Modi-a chungchang mawi lo taka sawia puhin, BJP Delhi unit chuan a lakah thubuai an thehlut.

BJP Delhi unit hotu, Satish Upadhyay hoin BJP hruaitute chuan Delhi police commissioner Alok Kumar an hmu a, February thlaa Urdu Academy-a hun buatsaiha MLA thusawi lai video clip an pe tel a ni. BJP chuan eptu party te chu PM sawichhiat chu politics khelhna atana hmangah an puh bawk.

MLA Khan chuan BJP puhna hi chhangin, BJP kaihhruai sorkar laipui chu Dalit leh hnam hnuaihnung zawkte ngaihthah tiin a sawi tih a tarlang a, "Modi-a kaihhruai sorkar chuan Dalit te a ngaihsak lo tih ka sawi mai a ni a, thil dik lo ka sawi em ni? Sorkar policy te a ṭhat loh thu sawiin, Dalit leh hnamhnuai leh zirlaite zalenna a hrekbeh sak a, dik lo taka puha jail-a an khung chungchangte ka sawilang mai a ni" a ti.

AAP converner leh Delhi Chief Minister Arvind Kejriwal leh AAP hruaitu pathumte chu Punjab-ah pawl leh pawl inkara harsatna chawk chhuakah puhin an lakah thubuai thehluh a ni bawk.

Kejriwal leh AAP hruaitute laka thubuai hi Ludhiana court-ah Jagriti Manch Punjab pawl hruaitu, Jagdeep Sigh Gill-an a thehluh a ni. Complain a theh-luhah hian Gill chuan AAP hruaitute hian nakkuma assembly inthlan an neih tur thlirin, Hindu leh Sikh inkara harsatna thlen thei zawngin thil an ti niin a sawi. AAP thiltih chuan state ralmuang leh muanawm, Punjab-ah chuan buaina leh firfiaka chetna te a chawhchhuah mai a hlauhthawn thu te tarlang a ni. Thubuai hi March 19 hian ngaihtuah a ni ang.