LS Speaker hlui PA Sangma a thi

Lok Sabha Speaker hlui leh Meghalaya Chief Minister hlui, PA Sangma chu kum 68 mi niin nimin khan New Delhi-ah heart attack vangin a thi.

Nimina Parliament inhnih inkhawm pawh Speaker hlui sun nan tihtawp a ni a, Lok Sabha rorel inkhawm chu March 8 ah ṭan a ni dawn a, Rajya Sabha pawh March 9 thleng an chawl ang.

Lok Sabha Speaker Sumitra Mahajan chuan uina thu sawiin, "PM Sangma hi kan sun tak zet a ni, a hnen aṭang hian hlim hmel pu chunga Lok Sabha rorel kaihhruai dan pawh ka zir a ni" a ti.

Sangma hian President thlannaah Pranab Mukherjee a lo khing tawh a, mahse a chak zo lo a ni.

Meghalaya CM hlui, Sangma hi kum 1947, September 1 khan West Garo Hills district, Meghalaya-a Chapahati khua-ah a piang a, St Antony's College aṭanga graduate-in Assam-a Diburgarh University aṭangin International Relationships master degree a zo. A hnuah Law a zir zui leh a ni.

Kum 1975 khan Meghalaya Pradesh Congress Committee General Secretary atan thlan a ni a, kum 1980 thleng he post hi a chelh a ni. Kum 1977 khan a ṭum khatna turin Congress ticket-in Lok Sabha member atan thlan tlin a ni a, term riat thlan tlin zui a ni. Kum 1996-1998 khan Lok Sabha Speaker a ni.

Kum 1980 khan union cabinet minister atan lakluh a ni a, Deputy Minister in charge of Industry-ah dah a ni. Kum hnih hnuah Ministry of Commerce as Deputy Minister atan ruat a ni leh a, he hna hi kum 1984, December thla thleng a chelh. Kum 1988-1990 chhung khan Meghalaya Chief Minister a ni bawk.

Kum 1999 khan Congress president Sonia Gandhi ramdang mi a nihna chungchang an sawisel avangin Sharad Pawar leh Tariq Anwar nen Congress party aṭanga hnawhchhuah an ni a, an pathum hian political party thar Nationalist Congress Party (NCP) an din zui a ni.

Mahse kum 2004 khan NCP hi a chhuahsan a, regional party dinin a hnuah Trinamool Congress-ah inchhunfinin Nationalist Trinamool Congress an din. Mahse 2005 khan All India Trinamool Congress member a nihna aṭangin a bang a, NCP a zawm leh a ni. Mahse kum 2012 khan NCP hruaitu Sharad Pawar-an President thlanna neih tura he tihlaia rorellai, Congress candidate Pranab Mukherjee khin a tumna chu a dodal avangin NCP aṭang hian a bang leh a ni. President thlannaah hian BJP, BJD, AIADMK leh party tenau dangten thlawp mah se Sangma hi a chak zo lo.