India aṭanga zalenna ni lo, India rama zalenna kan duh : Kanhaiya

Jawaharlal Nehru University (JNU) Students' Union president, Kanhaiya Kumar chu ram dodal leh hel zawnga thu sawiah puha man a nih hnuin, Ningani khan bail-a chhuah tir a ni.

Tihar Jail aṭanga chhuah tir a nih hnuin Kahaiaya Kumar hi Ningani khan university campus-ah kirin zirlai tam takin an lo hmuak. Zanah zirlai pungkhawmte hmaah thu a sawi a, zirlaite chuan India aṭanga zalen ni loin, India ram chhunga zalenna an duh a ni, a ti. Rilṭamna, eirukna, inthliarhranna leh hnungtawlh zawnga kalna lak aṭanga zalenna an duh tih a sawi.

Kum 28 mi, Kanhaiya Kumar chuan Prime Minister Narendra Modi leh a kaihhruai BJP sorkar chu na takin a bei zui nghal a, university leh zirlaite chuan Hyderabad University zirlai, Rohith Vemula intihhlum chungchangah rorelna dik phutin Occupy UGC movement an kalpui a, hei vang hian sorkar chuan an university chu a rawn bitum ta niin a sawi.

Kanhaiya chuan, "Rohith Vemula tana zirlaite beihna chu tukdawl an tum a, UGC in nawrh a huaihawt chu hneh an duh avangin ruahman lawkna hnuaiah JNU chu beih a ni" a ti. Darkar khat chhung thu hi sawiin, harsatna a tawh laia amah thlawptu zirlai leh university chungah lawmthu a sawi nghal bawk.

Sorkar chuan sawiselnate a dawngsawng thiam lo niin Kanhaiya chuan a puh bawk. Sorkar leh a policy sawiseltute chu video lem siam hmangin an cyber cell chuan a bei let a ni a ti a, "Ram mipui 69% chuan an thu-thlung kalpui hi an duh lo a ni" a ti.

BJP zirlai pawl ABVP nen chuan hmelma an ni lo tih sawiin, Kanhaiya chuan politics lama a khingpui a ni mai tih a sawi a, PM Modi nen chuan politics lamah an ngaihdan in ang lo hle mah se, twitter-ah 'Thudik chu ala dingchang ang' tia a sawi chu a ni pawhin a pawm thlap tih a sawi.

Delhi High Court chuan Kanhaiya Kumar hi thla ruk chhung atan interim bail a pe a, Delhi sorkar pawhin university campus-ah ram dodalna lam hawia thu sawia puhna chu finfiahna a awm loh avangin sorkarin a hemi chungchang a chhui mekna aṭangin hming hi a paih tawh bawk. Delhi sorkarin a forensic expert-te a enfiah tir hnuah, campus-a ram dodal leh hel zawnga thu sawina video nia sawi pasarih zinga pahnih chu siamchawp a ni tih finfiah a ni tawh.

Congress hruaitu Shashi Tharoor chuan BJP chuan Kanhaiya Kumar chu politics lama mithar ropui takah a chher chhuah phah ta zawk niin a sawi.

CPI (MO) hruaitu Sitaram Yechury pawhin Kanhaiya chu a lawmpui thu sawiin, India hmalam hun chu ṭhalaite kutah a in-nghat tawh a ni, a ti.

Delhi Chief Minister Arvind Kejriwal-a chuan Kanhaiya thusawi chu fakin, "Prime Minister Modi chu vawi tam tak zirlaite chhaih buai lo turin ka hrilh tawh a, mahse ka thu a zawm lo a ni' tiin a sawi.