Gujarat-ah firfiak 10 an lut niin an sawi State pumah venhimna tikhauh nghal

Intelligence Bureau chuan Gujarat state-ah firfiak nia hriat mi 10 an lut a, pawikhawihna lian tham tak thlentir an tum niin state police-te an hriattir.

State police-te chuan warning an hmuh veleh state pumah venhimna khauh takin an kalpui nghal a, National Security Guard team pali-a commando te chuan firfiakte dapchhuah hna hi an thawk mek a ni.

Mipui punkhawmna hmun pawimawh, temple, bazar, rel station leh airport-ahte venghimtu dah belh an ni a, state police hotu chuan army leh paramilitary official-te meeting neihpuiin venhimna lama an inbuatsaih dante a thlirpui. Police hotu hian police chawlh la zawng zawngte pawh an chawlh lak a cancel sak nghal bawk.

Kar kalta Inrinni khan Border Security Force-te chuan Indo-Pakistan ramri-a Kutch lui dungah Pakistan lawng pakhat an man a, mahse lawnga chuangte hian security force-te hi an hmuh veleh an tlanchhe nghal a ni. Lawng hi enfiah a nih hnuin rinhlelhawm thil hmuh an nei lo niin an tarlang.

Army commander pakhat chuan Gujarat-a Maha Shivaratri festival hmanlai leh, Parliament session neih mek laiin pawikhawihna lian tak thlen tumin India ramah firfiakte rawn luh an tum tih thawm an hriat thu a sawi.

Gujarat state festival, Maha Shivaratri hi vawiin aṭang hian ṭan a ni dawn a, he festival hman chhung hian khualzin tam takin temple hrang hrang an tlawh ṭhin. Hei vang hian temple-ah venhimna khauh taka kalpui tura hriattir an nih thu state Home Minister Rajni Patel chuan a sawi. Pakistan ramri bula awm, Kutch province-ah chuan hmun pawimawh laiahte camera dah nghal a ni a, hotel ṭhenkhat pawh dap a ni bawk.

Kolkata-a NSC Bose International Airport pawh beih tuma vauna thu thawn an dawn vangin venhimna khauh zawka kalpui a ni a, airport thuneitute chuan police-ah complain an thehlut nghal bawk.

Nmin khan airport manager chuan e-mail ah vauna thu hi a dawng a, a mail dawnah darkar 24 chhungin airport chu bomb chhiat a nih tur thu an ziak a, he mail hi Germany aṭanga thawn nia hriat a ni.

Gujarat-a firfiak lutte hi New Delhi-ah an katlang mai thei nia sawi thawm a awm leh vangin Delhi kahwpui chhungah pawh nimin khan venhimna uluk taka kalpui a ni. Police-te pawh mipui lunna bialte veng uluk tur leh, camera-te pawh dah tura hriattir an ni.

Pakistan aṭanga firfiak rawn luh tumte hi Lashkar-e-Taiba emaw Jaish-e-Mohammed emaw mi leh sate nia rin an ni bawk.