Vijay Mallya lakah ED-in thubuai ziak lut

Enforcement Directorate chuan sumdawng lian, Vijayh Malla leh a airlines tihtawp tak, Kingfisher Airlines-a chief financial officer-te chu dan kalha sum thawn kualah puhin an lakah thubuai a ziak lut.

Central Bureau of Investigation (CBI) chuan IDBI bank official-te nen inthurualin dan kalha Vijay Mallya hnenah loan, cheng vaibelchhe 900 puktir nia sawi chungchang chu a chhui mek a ni. CBI thil chhui behchhan hian ED chuan thubuai hi a ziaklut ve leh bawk.

Kum 2015, October thla khan CBI chuan Kingfisher director, Mallya-a lakah hian eiruk leh dik lo taka thiltihna-a inhnamhnawihah puhin thubuai an siamsak a, Mumbai, Bengaluru leh Goa-a a in te dapsak a ni bawk. Thla hnih hnuah CBI hian thu zawhfiah turin a ko a ni.

CBI hian IDBI Bank hian audit report-ah Kingfisher Airlines sum dinhmun a ṭha lo tih ziah a ni chungin loan tam tham tak a puktir tih a hmuchhuak a ni. Report-a tarlan danin bank 17 intelkhawm hnenah hian Mallya-a company-te hian cheng vaibelchhe 7,000 chuang an ba a ni.