Sipai hman man Punjab-in a pe lo

Firfiakten Pathankot air force base an beih ṭuma sipaiten beihpui an thlak lêtnaa Punjab-in sorkar laipuia a pawisa pek tur, cheng vaibelchhe 6.35 chu a pe duh lo. Pathankot kha firfiak paruk ten an bei a, hetah hian sipai pasarih an thi.

Pathankot air force base beih a nih ṭuma firfiakte bei let tura Punjab sorkarin paramilitary force a hman nan khan Rs. vbch 6.35 a a ni a, heng paramilitary force a hman hawh man hi sorkar laipuia pe tur a nih laiin Punjab sorkar hian a pe duh ta lo a ni.

Sorkar laipui nena hemi chungchanga an inbiaknaah Punjab sorkar chuan sipai an hmanna hi India ram pumpui tan a ni a, chuvang chuan hemi ṭuma sum senso pawh hi state sorkara ṭhîn tur a ni lo niin a sawi; Punjab-ah hian Shiromani Akali Dal leh BJP ten thuneihna an chang mek a ni. Delhi-a home ministry lam chuan hetianga sorkar laipui hnuaia awm sipaite state-a rawih an nihin, an senso hi sorkar laipui mawhphurhna chu a ni a, mahse a hnuah state budget ang zelin siamṭhat a ni leh
ṭhin niin a sawi.

Ministry of home affairs hian January 2 aṭanga 27 chhunga Pathankot leh a chhehvela paramilitary force te rawih an niha senso kha state sorkar hnenah hian a ṭhing a ni. Hemi ṭum hian ni 25 chhungin paramilitary force company 20 lai hman an ni. Company pakhat hman nana senso hi ni khatah Rs. 177,143 niin, home ministry lehkha chuan a tarlang. Hei bakah hian heng sipaite thiarvelna senso pawh pe tura hriattir a ni bawk. Paramilitary force zingah hian CRPF company 11 leh BSF company 9 hman an ni.

Punjab sorkar chuan sipai company 20 a hman zinga company paruk chu dan leh thupek kengkawh tur ni loin, firfiakte an relhbo lohna tura lo vêngtu ang chauha hman niin a sawi.