JNUSU-in Registrar thusawi chhang let
Jawaharlal Nehru University (JNU) Students' Unon chuan university Registrar Bhupinder Zutshi chu zirlai pawl president Kanhaiya Kumar leh zirlai dangte chungchangah thu dik lo sawiah an puh.
February 9-a campus chhunga Parliament beitu firfiak khaihlum tak, Afzal Guru puala zirlai ṭhenkhatten inkhawm an buatsaihah JNUSU president Kanhaiya Kumar leh zirlai dang panga chu ram dodal leh hel zawng thu sawiah puhin thubuai siamsak an ni. He thil thleng chungchang chhui tura university Vice Chancellor M Jagadesh Kumar kaihhruai enquiry committee hmaah Registrar hian university thuneituten February 9-a hun hman tum cancel an tumna chu Kanhaiya Kumar hian a dodal tlat niin a hrilh.
Registrar thusawi hi chhang-in, JNUSU chuan thuchhuah a siam a, "Registrar hian JNUSU aiawh pathum - Kanhaiya Kumar, Rama Naga leh Saurabh Sharma (ABVP) te chu a hmu ngei a, mahse inkhawm buatsaih tur
ṭhulh tir tum lam ni loin, he inkhawma tel tum zirlai rual-banlote tana bus tlantir tur chung-chang an sawiho zawk a ni" a ti.
JNU Registrar-in Kanhaiya chungchanga thu dik lo a sawi chu an dem thu sawiin, zirlai pawl chuan JNUSU officer bearer-te pawhin an enfiah hnuah, Zutshi-a sawi ang hian JNUSU President leh Gneral Secretary-te hi a hranin a hmu lo ani, a ti. Office bearer dangte pawhin an inhmukhawm lo tih an sawi bawk niin JNUSU vice president Shehla Rashid Shora chuan a sawi.
Thu dik lo a thehdarh avangin university zirlai leh zirtirtute chuan Registrar an dem thu hi an sawichhuak bawk.
Hetihlai hian bail-a chhuak mek, JNUSU president Kanhai-ya Kumar chuan ram dodal leh phatsana puha tang mek, zirlai dang pahnihte chu chhuah zalen an nih theihna turin theihtawp a chhuah dawn tih a sawi. Kanhaiya hi Tihar Jail-a ni 18 dah a nih hnuah kar hmasa khan Delhi High Court chuan bail-a chhuah a dilna a phalsak a ni.
Kanhaiya chuan, "Sorkar leh police-ten bail-a ka chhuak tur chu an theih anga tih-khawtlai tumin an lo bei tawh a, kan inbeihna hi a la tawp mai dawn lo. Umar Khalid leh Anirban Bhatta-charya-te chhuah an la ni lo a, zirlaiten chhuah an nih theihna atana an hmalaknaah hma ka hruai zel dawn a ni" a ti.