Vijay Mallya-an India ram a chhuah-san tawh

Bank hrang hrang 17 intelkhawmten Supreme Court hnenah an laka sum tham tham tak batu, sumdawng lian Vijay Mallya chu India ram chhuahsan phalsak lo turin an ngenna chu nimin kha ngaihtuah ni mah se, Mallya hian March 2 khan India ram a lo chhuahsan tawh tih sorkar laipui chuan a sawi.

Vijay Mallya hian Kingfisher Airlines a tihtawp tak hming khan loan tam tham tak a la a, a loan ba a rulh loh hi cheng vaibelchhe 7,000 vel a tling tawh nia sawi a ni. Sum lama harsatna a tawh avangin kum thum kalta khan Mallya hian India rama airline lian ber dawttu ni ṭhin, Kingfisher Airlines chu a lo titawp tawh a ni. Mallya hi kar hmasa khan UK-a hmunpui nei, Diageo unit pakaht, United Spirits chairman a nihna aṭangin a lo bang tawh bawk.

A khawsak nawm ṭhin dan leh hautak tak avanga 'King of Good Times' tia hming an lo phuahsak tawh, Mallya hi a airlines hminga bank aṭanga sum a puk, cheng vaibelchhe 900 chu dik lo taka ram pawn lama thawnchhuakah puh a nih avangin thubuai siamsak a ni.

Mallya hian a leiba ngah avanga Kingfisher Airlines tihtawp a nih khan Diego hnenah hian United Spirits-a a share eng emaw zat chu a lo hralh tawh a ni. Mumbai-a a thil neihte pawh tun thla chhung hian bank-te chuan lilam sak an tum.

Nimin khan sorkar laipui chuan March 2 khan Mallya hian India ram a chhuahsan tawh tih CBI-in a hriattir thu Supreme Court-ah a rilh. Court chuan London-a Indiah High Commission kaltlangin Mallya hnenah hian email a thawn nghal a, a passport hrensak a nih lohna chhan tur chu kar hnih chhunga hriattir turin a hrilh.