Women's Bill siam turin theihtawp chhuah mek

Sorkar laipui chuan rorelnaa hmeichhiate chanpual dahsakna tur, Women's Reservation Bill chu party hrang hrangte lungrual taka an pawm tlan theih tura siam thuai a nih theih nan theihtawp a chhuah mek tih a sawi.

Sorkar hmasa, Cong-ress party kaihhruai UPA hnuaiah khan Women's Reservation Bill hi siam tumin beih ni mah se, party hrang hrangten an pawm tlan theih loh avangin kum 10 zet tihkhawtlai a ni tawh. BJP kaihhruai NDA sorkar thar hian pass tumin hma a la zui ve leh a ni.

Parliamentary Affairs Minister M Venkaiah Naidu chuan, "Sorkar laipui chuan kan pawm tlan theih tur siam tumin kan bei mek a, a rang thei anga tihfel thuai kan beisei" a ti. He bill-ah hian Lok Sabha leh assembly-a hmeichhiate puala seat 33% dah rawt a ni.

Kum 2010 khan Women's Reservation Bill hi Rajya Sabha-ah pass a ni tawh a, mahse Lok Sabha-ah party eng emaw zatin an dodal avangin a tlang thei ta lo a ni.

Eptu party-ten Women Bill tihfel theih hun tur tiam tura an phutna chu chhangin, Naidu chuan, "Congres sorkar pawh khan kum 10 chhungin a puitlin thei bik lo a ni" tiin a sawi. Hetihlai hian Prime Minister Narendra Modi-a kaihhruai sorkar chuan hmeichhiate thuam chakna tur scheme hrang hrang a siam tawh a ni, a ti.