Cabinet-in rural LPG scheme a pawm

Union cabinet chuan mi rethei chhungkua-a hmeichhiate tana a thlawna eirawngbawlna gas, LPG connection pekna tur scheme chu a pawm.

Prime Minister Narendra Modi kaihhruai cabinet meeting hian rural LPG scheme, Pradhan Mantri Ujwala Yojana kalpuina tur hian kum thum chhung atan cheng vaibelchhe 8,000 a ruahman tih Oil Minister Dharmendra Pradhan chuan a sawi.

He scheme hmang hian BPL chhungkua-a hmeichhiate hnenah LPG connection a thlawna pek a ni ang.

Finance Minister Arun Jaitley chuan Union Budget a pharh ṭum khan he scheme hi a lo puang tawh a, mi retheite chuan ei rawngbawlna gas hi a hmang pha lo tih a sawi. "India rama hmeichhe tam tak chu rawngbawl laiin meikhuin a ur nasa a, mithiamte chuan choka-a an eirawngbawlna mei khuk dan hi darkar khata cigarette 400 vel hal ang hu niin an chhut a ni. Hei vang hian an dinhmun hi siamṭhat sak an ngai tawh a ni" a ti.

Minister chuan mi rethei chhungkua, hmeichhe hminga awmte tan a thlawna LPG pek hi a rel ta tih sawiin, "Kumin budget-ah he scheme atan hian cheng vaibelchhe 2,000 dah a ni a, hei hi kum 2016-17 chhungin BPL chhungkua nuai 50 velin an chhawr thei dawn a ni" tiin a sawi.

Ramchhunga BJP chhungkua vaibelchhe nga-te tuam kim an nih theihna turin he scheme hi a tlem berah kum hnih dang la kalpui a ngai dawn niin minister chuan a sawi bawk.