Art of Living foundation cheng vbc 5 chawi turin ti

Art of Living foundation dintu, Sri Sri Ravi Shankar-an Yamuna lui kama World Culture Festival buatsaih a tumna chu National Green Tribunal (NGT) chuan phalna a pe a, hemirual hian foundation chu cheng vaibelchhe nga a chawitir nghal bawk.

Ravi Shankar-a chuan cultural event a huaihawt dawn avangin cheng vaibel-chhe nga chawitir an tum chu pek a tum lo tih a sawi a, a ṭul a nih chuan jail tan pawh a huam tih a sawi.

Kum 59 mi, Shankar chuan, " Thil tihsual engmah kan nei lo, pawisa hi cheng khat pawh kan pe dawn lo a, jail-ah pawh kan tang zawk mai ang" tiin, culture festival buatsaih a tum chu cultural olympics ang a nih thu leh, hei hi lawm taka lo dawnsawn zawk tur a ni, a ti. Art of Living chuan dan engmah a palzut lo tih sawiin, Yamuna lui kama festival buatsaihna tura an thil siam leh ruahmanaahte thuneitute aṭangin phalna an la vek tih a sawi bawk.

NGT chuan Sri Sri Ravi Shankar hi a sum chawi tur pe tur hian vawiin tlai dar 5 thleng hun a pe a, pawisa hi a pe lo a nih chuan dan ang taka a chunga hremna lek a nih tur thu a sawi.

Festival hi vawiin aṭanga ṭan tur a ni a, ni thum a awh ang. Prime Minister Narendra Modi pawh festival-ah hian tel a tum.