ICMR-in a zawnin ni hnih Sample nuai 8 chuang an endik

India ramah hripui lengin ziaawm lam pan thei lo mah se hri dona kawnga thawktu frontline worker-te'n nasa taka an thawhna chuan rah duhawm a chhuah zel a, Indian Council of Medical Research (ICMR) pawhin ni hnih chhungin ramchhung hmun hrang hrangah sample nuai riat chuang ve ve an endik tawh tih report an tihchhuahah an tarlang.

Ministry of Health and Family Welfare-in nimina report an tihchhuahah  ram chhung hmun hrang hrangah hri kai hmuh chhuah thar mi 64,553 an awm leh tih tarlangin hri kai hmuh chhuah 24,61,190 an awm tawh.

Enkawl dam pawh an tam hle a, darkar 24 chhungin dama puan mi 55,573 awm lehin hei nen hian hri kai tawh zinga mi 17,51,555 chu an dam leh tawh a, mi 6,61,595-in hri an la kai mek a ni. Ni khatah hri kai thi 1,007 an awm belh leh avangin India ramah Covid-19 vanga thi mi 48,040 an awm tawh bawk.

India ram hi hri kai tam ram pathumna mah ni se ni thum liam ta chhung khan US leh Brazil aiin ni khata hri kai hmuh chhuah thar an tam tawh zawk.

Indian Council of Medical Research (ICMR) nimina report an tihchhuahah Covid-19 sample 8,48,728 an endik leh tih sawiin, ni hnih chhung chu a zawnin nuai riat chuang sample an endik tawh a ni. 

India hian ni khata sample nuai 10 tal endik tumin hma a la mek a, hemi atan hian 'Test, Track and Treat' strategy kalpuiin  test tam lamah pawh hma a sawn hle. Hri len ṭantirh kha chuan India ram pumah Covid-19 sample endik theihna laboratory hi pakhat chiah awmin, ni khatah sample 100 awrhte an endik thei a, tunah erawh sample endik tam lamah hian hmasawnna a nasa hle. 

Hri len ṭantirh aṭanga nimin thleng khan sample 2,76,94,416 an endik tawh. ICMR hian laboratory pawmpui 1451 an nei tawh a, heng zinga 958 hi sorkar laboratory niin 493 hi private laboratory a ni ve bawk.

India ram State leh Union Territory zinga Covid-19 kai tamna ber Maharsahtra-ah chuan nimin thleng khan hri kai 5,60,126 an awm tawh a, nimin report-ah ringawt pawh hmuh chhuah thar 11,813 an awm leh a ni. 3,90,958 chu enkawl dam tawhin 19,063 chuan an thihpui tawh a, 1,50,105-in hri an la kai mek. 

Tamil Nadu-ah chuan hri kai 3,20,355 an awm tawh a, Andhra Pradesh-ah 2,64,142 awm tawh bawk­in Karnataka-ah chuan 2,03,200 lai an awm ve tawh bawk a ni.